راجستھان میں بھارتی ائیرفورس کا لڑاکا طیارہ گرکر تباہ ہوگیا

راجستھان میں بھارتی ائیرفورس کا لڑاکا طیارہ گرکر تباہ ہوگیا۔

بھارتی میڈیا کے مطابق ائیر فورس کا طیارہ راجستھان کے شہر چھرو میں گرکر تباہ ہوا جس کے نتیجے میں ابتدائی طور پر 2 افراد کے زخمی ہونے کی اطلاع ملی۔

تاہم بھارتی خبر رساں ادارے انڈیا ٹوڈے نے تصدیق کی ہےکہ طیارے کے حادثے میں اس کا پائلٹ ہلاک ہوگیا ہے۔

بھارتی میڈیا کے مطابق مقامی افراد کا بتانا ہے کہ جائے حادثہ پر زور دار دھماکے کے بعد دھواں اٹھتے دیکھا گیا جس کے بعد مقامی لوگ اور ریسکیو حکام حادثے کی جگہ پر پہنچے۔ 

حکام فوری طور پر جائے وقوعہ پر پہنچ گئے ہیں، تفتیش اور ریسکیو کارروائیاں جاری ہیں۔

تین ماہ قبل، اپریل میں بھی اسی طرح کا واقعہ پیش آیا تھا جب بھارتی فضائیہ (IAF) کا دو نشستوں والا لڑاکا طیارہ جام نگر ایئرفیلڈ سے رات کے مشن کے دوران پرواز کے فوراً بعد گر کر تباہ ہو گیا۔

بھارتی فضائیہ کے مطابق، پرواز کے دوران طیارے میں تکنیکی خرابی پیدا ہوئی، جس کے بعد پائلٹوں نے جانی نقصان اور ایئرفیلڈ یا آس پاس کے آبادی والے علاقوں کو بچانے کے لیے طیارے سے نکلنے (ایجیکٹ) کا فیصلہ کیا۔