پاکستان کا چین میں پانڈا بانڈ کے لیے روڈ شو کا انعقاد

پاکستان نے چین میں پانڈا بانڈ کے حوالے سے سرمایہ کاروں میں آگاہی پیدا کرنے کے لیے روڈ شو کا انعقاد کیا ہے۔

معاشی ماہر خرم شہزاد کے مطابق یہ ایک نان-ڈیل روڈ شو ہے جو 7 سے 11 جولائی تک جاری رہے گا۔ اس کا مقصد پانڈا بانڈز میں ممکنہ سرمایہ کاروں کو تفصیلات فراہم کرنا اور ان کی دلچسپی حاصل کرنا ہے۔

انہوں نے بتایا کہ چین میں سرمایہ کاروں کے ساتھ وزارتِ خزانہ کے تکنیکی ماہرین کے اجلاس جاری ہیں۔

خرم شہزاد کے مطابق پاکستان رواں سال کے آخر تک پانڈا بانڈز جاری کرنے کا ارادہ رکھتا ہے، جس کے ذریعے 20 سے 30 کروڑ ڈالر تک کی سرمایہ کاری کے مواقع پیدا کیے جا سکتے ہیں۔

انہوں نے مزید کہا کہ پاکستانی ٹیم چین میں کریڈٹ ریٹنگ ایجنسیوں کے ساتھ بھی ملاقاتیں کر رہی ہے تاکہ بانڈز کے اجرا سے قبل تمام ضروری مراحل مکمل کیے جا سکیں۔

قبل ازیں، وزیر خزانہ محمد اورنگزیب نے کہا تھا کہ پاکستان اپنی مالیاتی مارکیٹ کو چین کی کیپٹل مارکیٹ کے ساتھ ہم آہنگ کرنے کے لیے یوآن پر مبنی پانڈا بانڈز کے اجرا کی منصوبہ بندی کر رہا ہے۔ ان کے مطابق اس اقدام سے بیجنگ میں کرنسی کے استعمال کو فروغ ملے گا اور پاکستان 20 سے 25 کروڑ ڈالر کے حصول کا خواہاں ہے۔

وزیر خزانہ نے ساؤتھ چائنا مارننگ پوسٹ کو دیے گئے ایک انٹرویو میں بتایا تھا کہ مصر کے ماڈل کی طرز پر یوآن بانڈز کے لیے بینک گارنٹی کے حصول کے لیے ایشین انفرا اسٹرکچر انویسٹمنٹ بینک (AIIB) سے بات چیت جاری ہے۔ انہوں نے اس بات پر زور دیا کہ پاکستان جلد اپنی کریڈٹ ریٹنگ کو سنگل 'بی' میں لانے کے لیے پرعزم ہے، اور ملکی معیشت کے استحکام کے لیے چینی سرمایہ کاری کلیدی کردار ادا کرے گی۔

انہوں نے کہا کہ پاکستان سی پیک کے اگلے مرحلے میں چین کے ساتھ مزید تعاون چاہتا ہے، جس میں اسپیشل اکنامک زونز، زراعت اور انفارمیشن ٹیکنالوجی جیسے شعبوں کی ترقی شامل ہے۔

وزیر خزانہ نے زور دیا کہ چین کے نجی شعبے اور برآمدی صنعتوں کو پاکستان میں سرمایہ کاری کرنی چاہیے۔ بڑی چینی کمپنیاں اپنے برآمدی یونٹس پاکستان منتقل کر کے ملک کو ایک برآمدی مرکز بنا سکتی ہیں۔ سی پیک کے دوسرے مرحلے میں برآمدی صنعتوں کو ترجیح دے کر قرضوں کی ادائیگیوں کو آسان بنایا جائے گا۔

انہوں نے یہ بھی کہا کہ پاکستان کی درآمدات پر انحصار کرنے والی معیشت کو زرمبادلہ کے ذخائر میں کمی اور ادائیگیوں کے توازن کے مسائل کا سامنا ہے۔ تاہم، چینی کمپنیوں کے لیے سیکیورٹی میں بہتری لائی جا رہی ہے۔ ملک میں سیکیورٹی کی صورتحال بہتر ہوئی ہے، عالمی کانفرنسز منعقد ہو رہی ہیں اور غیر ملکی وفود کی آمد جاری ہے۔ حکومت پاکستان غیر ملکی کمپنیوں اور سرمایہ کاروں کے تحفظ کو اولین ترجیح دے رہی ہے۔