اسرائیل: تیز رفتار کار فوجیوں پر چڑھ دوڑی،معتدد کی حالت تشویشناک

تل ابیب : اسرائیل کے وسطی علاقے میں ایک تیز رفتار کار فوجیوں پر چڑھ دوری جس کے نتیجے میں متعدد فوجی زخمی ہو گئے جن کو تشویشناک حالت میں اسپتال منتقل کر دیا گیا،جبکہ اسرائیلی حکام کی جانب سے اسے دہشت گرد حملہ قرار دیا جا رہا ہے۔

غیر ملکی میڈیا کے مطابق یہ واقعہ شہر نتانیا کے قریب داخلی راستے پر ایک چوکی پر پیش آیا، حملہ آور کار سوار جائے وقوعہ سے فرار ہوگیا، گاڑی کے مالک کی شناخت کر لی گئی جو ایک اسرائیلی شہری ہے تاہم ممکنہ طور پر گاڑی چوری کی گئی تھی۔

میڈیا رپورٹ کے مطابق اسرائیلی فوج نے تصدیق کی ہے کہ کارسوار کے حملے زخمی ہونے والے 8 افراد فوجی اہلکار ہیں۔ جن میں سے 5 کی حالت نازک ہے،جن کو کو فوری طور پر ہیلیل یافے میڈیکل سینٹر، ہادیرہ، اور لینیادو اسپتال، نتانیا منتقل کر دیا گیا۔

دوسری جانب پولیس حکام کا کہنا ہے کہ حملہ آور مغربی کنارے کے علاقے بیت لید میں کار کو چھوڑ کر فرار ہوگیا۔ کار کو تحویل میں لے لیا گیا اور کار سوار کی تلاش تاحال جاری ہے۔

پولیس اور سیکیورٹی اداروں نے کار سوار کی تلاش کے لیے ایک بڑا سرچ آپریشن شروع کر دیا،جبکہ کار کے مالک سے بھی پوچھ گچھ کی جا رہی ہے۔