شکیب الحسن کا ریکارڈ،ٹی ٹوئنٹی کرکٹ میں نئی تاریخ رقم کر دی 

ڈھاکا: بنگلہ دیش کے آل راؤنڈر شکیب الحسن نے ٹی ٹوئنٹی کرکٹ میں شاندار کارنامہ سرانجام دیتے ہوئے نئی تاریخ رقم کردی۔

تفصیلات کے مطابق شکیب الحسن ٹی ٹوئنٹی کرکٹ میں 500 وکٹیں حاصل کرنے والے دنیا کے پانچویں بولر بن گئے ہیں۔

انہوں نے یہ سنگ میل کیریبین پریمیئر لیگ (سی پی ایل) میں انٹیگا اینڈ باربوڈا فالکنز کی جانب سے کھیلتے ہوئے سینٹ کٹس اینڈ نیوس پیٹریاٹس کے خلاف میچ میں محمد رضوان کی قیمتی وکٹ لے کر عبور کیا۔

شکیب نے میچ میں مزید دو وکٹیں حاصل کیں، جس کے بعد ان کی وکٹوں کی مجموعی تعداد 502 ہوگئی۔ اس کے ساتھ ہی وہ ٹی ٹوئنٹی کرکٹ میں 7000 رنز اور 500 وکٹیں مکمل کرنے والے دنیا کے پہلے آل راؤنڈر بھی بن گئے ہیں۔

واضح رہے کہ ٹی ٹوئنٹی کرکٹ میں سب سے زیادہ 660  وکٹیں افغانستان کے اسپنر راشد خان نے حاصل کررکھی ہیں ۔

ان کے بعد ویسٹ انڈیز کے ڈوین براوو 631، سنیل نارائن 590 اور جنوبی افریقہ کے عمران طاہر 554 وکٹوں کے ساتھ نمایاں بولرز میں شامل ہیں۔