وفاقی تعلیمی بورڈ کا انٹرمیڈیٹ کے نتائج کا اعلان، طالبات بازی لے گئیں

اسلام آباد: وفاقی تعلیمی بورڈ نے انٹرمیڈیٹ پارٹ ون اور ٹو کے سالانہ نتائج کا اعلان کر دیا۔ اس موقع پر وفاقی وزیر مملکت برائے تعلیم وجہہ قمر نے تقریب میں بطور مہمان خصوصی شرکت کی اور نمایاں کارکردگی دکھانے والے طلبا و طالبات کو مبارکباد پیش کی۔

پری میڈیکل گروپ میں علی طارق نے 1071 نمبر لے کر پہلی پوزیشن حاصل کی، وردہ سرفراز 1070 نمبروں کے ساتھ دوسری پوزیشن پر رہیں جبکہ عروہ ملک اور مناہل مرتضی نے مشترکہ طور پر تیسری پوزیشن حاصل کی۔

پری انجینئرنگ گروپ میں مزمل ساجد نے 1063 نمبر کے ساتھ پہلی، محمد سمیع نے 1059 نمبروں کے ساتھ دوسری اور عائشہ نعیم نے 1054 نمبروں کے ساتھ تیسری پوزیشن اپنے نام کی۔

گیارہویں جماعت کے امتحانات میں 97 ہزار 928 طلبہ و طالبات شریک ہوئے جن میں سے 60 ہزار 794 کامیاب قرار پائے جبکہ بارہویں جماعت میں 96 ہزار 521 امیدوار شریک ہوئے جن میں سے 79 ہزار 881 نے کامیابی حاصل کی۔

وفاقی بورڈز کے مطابق انٹر میڈیٹ کا مجموعی نتیجہ83.19 فیصد رہا۔ طلبہ کی کامیابی کا تناسب 75.85 فیصد جبکہ طالبات کی کامیابی کا تناسب 88.91 فیصد رہا۔ 
پری میڈیکل گروپ میں کامیابی کا تناسب 94.04 فیصد رہا جبکہ پری انجینئرنگ گروپ میں کامیابی کا تناسب 88.89 فیصد ریکارڈ کیا گیا۔