افغانستان نے سہ ملکی ٹی 20 سیریز میں پاکستان کو 170 رنز کا ہدف دیا

شارجہ کرکٹ اسٹیڈیم میں کھیلے جانے والے سہ فریقی ٹی 20 سیریز کے چوتھے میچ میں افغانستان نے پہلے بیٹنگ کرتے ہوئے پاکستان کو جیت کے لیے 170 رنز کا ہدف دیا ہے۔ افغانستان نے مقررہ 20 اوورز میں 5 وکٹوں کے نقصان پر 169 رنز بنائے۔

افغانستان کے ٹاپ آرڈر بیٹسمین ابراہیم زادران نے 65 اور صدیق اللہ اتل نے 64 رنز کی شاندار اننگز کھیلی۔ پاکستانی بولرز میں فہیم اشرف نے بہترین کارکردگی کا مظاہرہ کرتے ہوئے صرف 27 رنز دے کر 4 وکٹیں حاصل کیں، جبکہ صائم ایوب کو ایک وکٹ ملی۔

شاہین شاہ آفریدی، حارث رؤف، صفیان مقیم اور محمد نواز اس میچ میں وکٹ حاصل کرنے میں کامیاب نہ ہو سکے۔

پاکستانی ٹیم میں دو تبدیلیاں کی گئی ہیں؛ فاسٹ بولرز سلمان مرزا اور حسن علی کی جگہ شاہین شاہ آفریدی اور حارث رؤف کو فائنل الیون میں شامل کیا گیا ہے۔

اگر پاکستان افغانستان کے خلاف یہ میچ جیت جاتا ہے تو وہ سہ ملکی سیریز کے فائنل میں جگہ بنا لے گا۔

پاکستان کی موجودہ پلیئنگ الیون میں کپتان سلمان علی آغا کے علاوہ صائم ایوب، فخر زمان، صاحب زادہ فرحان، حسن نواز، محمد نواز، محمد حارث، فہیم اشرف، شاہین شاہ آفریدی، حارث رؤف اور صفیان مقیم شامل ہیں۔

یاد رہے کہ پاکستان نے اس ٹرائی نیشن سیریز کے پہلے میچ میں افغانستان کو 39 رنز سے اور دوسرے میچ میں متحدہ عرب امارات کو 31 رنز سے ہرایا تھا۔