خیبرپختونخوا میں موسمیاتی تبدیلی کے لیے خود مختار کلائمیٹ ایکشن بورڈ کا قیام

خیبرپختونخوا حکومت نے موسمیاتی تبدیلی سے نمٹنے کے لیے خود مختار کلائمیٹ ایکشن بورڈ قائم کرنے کا فیصلہ کیا ہے۔ صوبائی اسمبلی نے ’کلائمیٹ ایکشن بورڈ بل 2025‘ کی منظوری دے دی ہے، جس کے تحت یہ بورڈ مکمل آزادی اور خود مختاری کے ساتھ کام کرے گا۔

اس بل کے مطابق، صوبائی کلائمیٹ ایکشن بورڈ میں 8 انتظامی سیکریٹریز، 2 ارکان اسمبلی اور 4 نجی شعبے کے ماہرین شامل ہوں گے۔

کلائمیٹ ایکشن بورڈ کا مینڈیٹ موسمیاتی تبدیلیوں سے متعلق پالیسی کی تیاری، مختلف محکموں سے رابطہ کاری، تحقیق، اور بین الاقوامی اداروں کے ساتھ تعاون پر مشتمل ہوگا۔

بورڈ کاربن کریڈٹ کے حصول، نئی موسمیاتی پالیسیاں مرتب کرنے، گرین ہاؤس گیسز کی فہرست تیار کرنے اور کم کاربن معیشت کو فروغ دینے میں بھی اپنا کردار ادا کرے گا۔ اس کے علاوہ، بورڈ کم از کم ہر چار ماہ میں ایک مرتبہ اجلاس کرے گا۔

اسی اجلاس کے دوران، خیبرپختونخوا زکوٰۃ اینڈ عشر ایکٹ میں بھی ترامیم کی گئیں۔ اب زکوٰۃ و عشر کونسل کے چئیرمین اور ارکان کی تقرری کا اختیار وزیر اعلیٰ کو دے دیا گیا ہے۔

مزید برآں، بل کے تحت تمام ٹھیکداروں سے 0.5 فیصد سوشل پروٹیکشن فیس لی جائے گی، جو تمام حکومتی محکموں، دفاتر اور خودمختار اداروں کے ٹھیکوں پر لاگو ہوگی۔