صوبائی حکومت کا پنجاب میں خواتین کے لیے سب سے بڑا اسپورٹس ایونٹ کرانے کا فیصلہ

لاہور: صوبائی حکومت کی جانب سے پنجاب میں خواتین کے لیے سب سے بڑا اسپورٹس ایونٹ ’’پنک گیمز‘‘منعقد کروانے کا فیصلہ کیا گیا ہے۔

تفصیلات کے مطابق اسپورٹس بورڈ پنجاب نے صوبے میں خواتین کا سب سے برا اسپورٹس ایونت پنک گیمز کرانے کا فیصلہ کر لیا ہے،اس حوالے سے صوبائی وزیر کھیل فیصل ایوب کھوکھر کی زیر صدارت اجلاس منعقد ہوا جس میں ایونٹ کے انتظامات کا تفصیلی جائزہ لیا گیا۔ 

اجلاس میں سیکرٹری اسپورٹس مظفر سیال اور ڈائریکٹر جنرل اسپورٹس خضر افضال چوہدری بھی شریک ہوئے۔ 

اجلاس کے دوران وزیر کھیل نے ہدایت دی کہ ’’کھیلتا پنجاب پنک گیمز‘‘ کے لیے فوری طور پر تیاریاں شروع کی جائیں اور اکتوبر کے آخر تک ایونٹ کے شیڈول کو حتمی شکل دی جائے۔ 

فیصل ایوب کھوکھر نے کہا کہ پنک گیمز میں پنجاب کے تمام ڈویژنز سے 3 ہزار سے زائد خواتین کھلاڑی شرکت کریں گی۔