حکومت چینی بحران کی ذمہ دار ہے ، شاہد خاقان عباسی

عوام پاکستان پارٹی کے کنوینر اور سابق وزیرِاعظم شاہد خاقان عباسی نے حکومت کو چینی بحران کا ذمہ دار قرار دیتے ہوئے الزام عائد کیا ہے کہ ایک منظم منصوبہ بندی کے تحت چینی مل مالکان کو اربوں روپے کا فائدہ پہنچایا گیا۔

اسلام آباد میں پریس کانفرنس کرتے ہوئے انہوں نے کہا کہ جب چینی کمیٹی کے چیئرمین کو ہٹا کر نائب وزیرِاعظم کو ذمہ داری سونپی گئی، تو اُسی روز پانچ لاکھ ٹن چینی کی برآمد کی منظوری دی گئی، جس کی کابینہ نے بھی توثیق کی۔

ان کے مطابق اس فیصلے کے فوری بعد ملک بھر میں چینی کی قیمتوں میں اضافہ شروع ہوا، حالانکہ فیصلہ سازی کے وقت یہ شرط رکھی گئی تھی کہ چینی کی فی کلو قیمت 140 روپے سے زیادہ نہیں بڑھے گی۔ 

مگر قیمت 230 روپے فی کلو تک جا پہنچی۔ شاہد خاقان عباسی کا کہنا تھا کہ اگرچہ پی ڈی ایم کے دور میں بھی چینی مہنگی ہوئی، مگر موجودہ حکومت کے فیصلوں سے عوام کو روزانہ ایک ارب روپے کا نقصان اٹھانا پڑا، جبکہ چینی ملز مالکان کو تقریباً 400 ارب روپے کا فائدہ ہوا۔

انہوں نے سوال اٹھایا کہ آیا حکومت عوام کی فلاح کے لیے کام کر رہی ہے یا مخصوص طبقے کے مفاد کے تحفظ کے لیے، اور کہا کہ چینی کی قیمتوں میں حالیہ اضافہ حکومتی پالیسی اور کابینہ کی ناکامی کا واضح ثبوت ہے۔