پاکستان پر قرضے 94 ہزار ارب روپے سے تجاوز کر گئے

پاکستان پر قرضوں اور واجبات کا بوجھ 94 ہزار 197 ارب روپے کی بلند ترین سطح پر پہنچ گیا ہے، جو کہ ملک کی مجموعی قومی پیداوار (جی ڈی پی) کے 82.1 فیصد کے برابر ہے۔

اسٹیٹ بینک آف پاکستان کی جانب سے جاری کردہ تازہ اعداد و شمار کے مطابق جون 2025 تک پاکستان پر مجموعی قرضوں اور واجبات میں 8 ہزار 740 ارب روپے کا اضافہ ریکارڈ کیا گیا، جو مالی سال 2024-25 کے دوران سامنے آیا۔

اسٹیٹ بینک کے مطابق:

غیر ملکی قرضہ اور واجبات: 34 ہزار 906 ارب روپے ، مقامی قرضہ: 54 ہزار 471 ارب روپے ، غیر ملکی واجبات (external liabilities): 4 ہزار 459 ارب روپے ، یہ تمام واجبات اور قرضے مجموعی طور پر ملک کی جی ڈی پی کے 82.1 فیصد کے قریب پہنچ چکے ہیں، جو معاشی لحاظ سے ایک تشویشناک حد سمجھی جاتی ہے۔

گزشتہ سال کی صورتحال

دستاویز کے مطابق جون 2024 میں ملک پر قرضوں اور واجبات کا کل حجم 85 ہزار 457 ارب روپے تھا، جس کے مقابلے میں ایک سال کے اندر اندر قرضوں میں 10 فیصد سے زائد اضافہ دیکھنے میں آیا۔

ماہرین معاشیات کے مطابق قرضوں میں مسلسل اضافہ نہ صرف معاشی خودمختاری کے لیے خطرہ بن رہا ہے بلکہ آئندہ مالی پالیسیوں پر بھی اس کا گہرا دباؤ محسوس کیا جائے گا۔