سمندری وسائل ہماری طاقت ہیں، مضبوط حکمت عملی سے فائدہ اٹھانا ہوگا: سابق نیول آفیسر

پاکستان نیوی کے ریٹائرڈ ریئر ایڈمرل فواد امین بیگ نے کہا ہے کہ پاکستان کے پاس بلیو اکانومی (سمندری معیشت) کا ایک بڑا خزانہ موجود ہے، جسے مؤثر حکمتِ عملی کے تحت بروئے کار لا کر ملک کی معیشت کو مضبوط بنایا جا سکتا ہے۔

ان کا کہنا تھا کہ پاکستان کا سمندر معدنیات، گیس اور دیگر قدرتی وسائل سے مالا مال ہے، اور اس شعبے پر کام کے لیے پاکستان نیوی نے کلیدی کردار ادا کیا ہے۔

ریئر ایڈمرل (ر) فواد امین بیگ نے بتایا کہ پاکستان نیوی نے چین کے تعاون سے سمندر کی تہہ میں سروے کرایا، جس کے نتائج میں گیس کے وسیع ذخائر کا انکشاف ہوا ہے۔ ان کا کہنا تھا:

"اب ضرورت اس بات کی ہے کہ ہم سرمایہ کاروں کو اس جانب راغب کریں، اور ان کی ٹیکنالوجی اور سرمایہ استعمال کر کے ان وسائل سے فائدہ اٹھایا جائے۔"

ففتھ جنریشن وار اور معیشت

ریئر ایڈمرل (ر) فواد امین بیگ نے کہا کہ جب بھی پاکستان ترقی کی راہ پر گامزن ہوتا ہے، دشمن عناصر ففتھ جنریشن وار کے ذریعے حالات خراب کر کے سرمایہ کاروں کو خوفزدہ کر دیتے ہیں۔

تاہم، ان کا کہنا تھا کہ اب ایس آئی ایف سی (Special Investment Facilitation Council)، فوجی قیادت اور سیاسی قیادت کے اشتراک سے ایک مضبوط دفاعی حکمت عملی تشکیل دی گئی ہے، جو نہ صرف سرمایہ کاروں کے اعتماد کو بحال کرے گی بلکہ پاکستان کو مضبوط معیشت کی طرف بھی لے جائے گی۔