ایشیا کپ2025: پاکستان اور یو اے ای کا میچ ہوگا، ٹیم اسٹیڈیم کیلئے روانہ ہو گئی

ایشیا کپ میں میچ ریفری کی تبدیلی کے معاملے پر پاکستان کرکٹ بورڈ اور آئی سی سی کے درمیان ڈیڈ لاک بدستور برقرار ہے، تاہم پاکستان اور متحدہ عرب امارات (یو اے ای) کے درمیان آج ہونے والا میچ ایک گھنٹے کی تاخیر سے شروع کیا جائے گا۔

یہ میچ دبئی اسٹیڈیم میں شیڈول تھا اور پاکستانی وقت کے مطابق شام 7:30 بجے کھیلا جانا تھا، لیکن اب اسے 8:30 بجے شروع کرنے کا اعلان کیا گیا ہے۔

پی سی بی کے ترجمان عامر میر کے مطابق، پی سی بی اور آئی سی سی کے درمیان بات چیت جاری ہے، اور چیئرمین پی سی بی محسن نقوی کی نجم سیٹھی اور رمیز راجہ کے ساتھ مشاورت کا سلسلہ بھی جاری ہے۔ ترجمان کا کہنا ہے کہ جیسے ہی کوئی حتمی پیشرفت ہوگی، چیئرمین میڈیا کو آگاہ کریں گے۔

اس سے قبل ذرائع کا دعویٰ تھا کہ پاکستان کرکٹ ٹیم کی ہوٹل سے اسٹیڈیم روانگی روک دی گئی ہے، اور کھلاڑیوں کو کمروں میں ہی رہنے کی ہدایت جاری کی گئی تھی۔

ذرائع کا یہ بھی کہنا تھا کہ اگر میچ ریفری اینڈی پائی کرافٹ خود معذرت کر لیتے تو معاملہ فوری طور پر حل ہو سکتا تھا۔ تاہم اب تک آئی سی سی کی جانب سے پی سی بی کو اینڈی پائی کرافٹ کی تبدیلی کے حوالے سے کوئی جواب موصول نہیں ہوا۔

پی سی بی ذرائع کے مطابق، اگر ریفری کی تبدیلی کی تصدیق نہ ہوئی تو پاکستانی ٹیم اسٹیڈیم نہیں جائے گی۔ چیئرمین محسن نقوی اس وقت بھی پی سی بی آفیشلز سے مسلسل رابطے میں ہیں، اور ٹیم کو گراؤنڈ بھیجنے کا فیصلہ صرف آئی سی سی کی جانب سے باضابطہ ای میل موصول ہونے پر ہی کیا جائے گا۔