ارشد ندیم ورلڈ ایتھلیٹکس چیمپئن شپ کے فائنل میں پہنچ گئے

اولمپک گولڈ میڈلسٹ اور پاکستان کے مایہ ناز جیولن تھرو ایتھلیٹ ارشد ندیم نے ورلڈ ایتھلیٹکس چیمپئن شپ کے فائنل مرحلے کے لیے کوالیفائی کر لیا ہے۔

تفصیلات کے مطابق، جاپان کے دارالحکومت ٹوکیو میں جاری ورلڈ ایتھلیٹکس چیمپئن شپ میں ارشد ندیم پاکستان کی نمائندگی کرنے والے واحد ایتھلیٹ ہیں۔ انہوں نے کوالیفائنگ راؤنڈ کے گروپ بی میں شرکت کی، جہاں انہوں نے اپنی پہلی کوشش میں 76.9 میٹر کی تھرو کی، جو کہ ان کی صلاحیتوں کے مطابق خاصی کمزور تھی۔

دوسری باری میں بھی ارشد اپنی کارکردگی بہتر نہ بنا سکے اور ان کی تھرو 74.17 میٹر ریکارڈ کی گئی، جس کے بعد ان کے فائنل تک رسائی کے امکانات مدھم دکھائی دے رہے تھے۔

تاہم، دباؤ میں شاندار واپسی کرتے ہوئے ارشد ندیم نے تیسری کوشش میں 85.28 میٹر کی زبردست تھرو کی، جس کے نتیجے میں وہ فائنل کے لیے کوالیفائی کرنے میں کامیاب ہو گئے۔

فائنل میں ارشد ندیم کا مقابلہ بھارت کے اسٹار ایتھلیٹ اور اولمپک چیمپئن نیرج چوپڑا سمیت دنیا کے دیگر ٹاپ جیولن تھروورز سے ہوگا۔