آزادکشمیر انتخابات : 45 نشستوں کیلئے پولنگ کا وقت ختم ، ووٹوں کی گنتی جاری

تفصیلات کے مطابق آزاد جموں وکشمیر قانون ساز اسمبلی کے انتخابات کیلئے پولنگ کا آغاز صبح 8 بجے شروع ہوا جو شام 5 بجے تک بغیر کسی وقفے تک جاری رہا۔ الیکشن کمیشن نے آزادانہ، منصفانہ اور شفاف انتخابات کو یقینی بنانے کیلئے بھرپورانتظامات کئے۔ سیکرٹری الیکشن کمیشن آزاد جموں و کشمیر کی جی این این سے ٹیلی فونک گفتگو میں کہا کہ پولنگ کا عمل طے شدہ وقت پانچ بجے ختم ہو گا۔ تاہم جو ووٹرز پانچ بجے تک پولنگ اسٹیشن کے احاطے میں داخل ہوں گے انہیں ووٹ کاسٹ کی اجازت ہو گی، پانچ بجے کے بعد کسی کو پولنگ اسٹیشن کے احاطے میں داخل ہونے کی اجازت نہیں ہو گی۔

واضح رہے کہ آزاد کشمیر  انتخابات ، پولنگ میں 32 لاکھ سے زائد ووٹر حق رائے دہی استعمال کررہے ہیں ، پاکستان میں بسنے والے ساڑھے 4 لاکھ سے زائد کشمیری  ووٹرز ہیں۔آزاد کشمیر میں 33 انتخابی حلقوں میں 587 اور مہاجرین کے 12 انتخابی حلقوں میں 121 امیدوار مدمقابل ہیں۔

ان انتخابات میں مسلم لیگ (ن)، پاکستان تحریک انصاف اور پاکستان پیپلز پارٹی کے امیدواروں کے درمیان ہے جبکہ مسلم کانفرنس، جماعت اسلامی اور جموں وکشمیر پیپلز پارٹی نے بھی اپنے امیدوار کھڑے کئے ہیں۔ آزاد کشمیر قانون ساز اسمبلی کے 11ویں عام انتخابات کیلئے آزاد کشمیر کیساتھ ساتھ پاکستان کے چاروں صوبوں میں بھی مہاجرین کے انتخابی حلقوں ووٹ ڈالے گئے۔