پی آئی اے اسلام آباد اورلاہور سے لندن ہیتھرو کے لیے براہِ راست پروازیں کب سے شروع کر رہی؟

وفاقی وزیرِ ہوا بازی خواجہ محمد آصف نے جمعرات کے روز اعلان کیا ہے کہ پاکستان انٹرنیشنل ایئرلائنز (پی آئی اے) مارچ 2026 کے اختتام پر اسلام آباد اور لاہور سے لندن ہیتھرو کے لیے براہِ راست پروازیں دوبارہ شروع کر رہی ہے۔

انہوں نے سوشل میڈیا پر اپنے پیغام میں کہا، “مجھے یہ اعلان کرتے ہوئے خوشی ہو رہی ہے کہ پی آئی اے 29 اور 30 مارچ 2026 کو بالترتیب اسلام آباد اور لاہور سے لندن ہیتھرو کے لیے براہِ راست پروازوں کا آغاز کر رہی ہے۔”
انہوں نے برطانیہ میں مقیم پاکستانی کمیونٹی کو مبارکباد بھی پیش کی۔

I am delighted to announce that PIA is commencing direct flights from Islamabad and Lahore to London Heathrow on 29 and 30 March 2026 respectively. Congratulations to the entire Pakistani diaspora in the United Kingdom, elderly people, businessmen and large number of students who…

— Khawaja M. Asif (@KhawajaMAsif) March 26, 2026

وزیرِ ہوا بازی کے مطابق حکومت نے مانچسٹر کے لیے پروازوں کی بحالی کے فوراً بعد لندن کے لیے براہِ راست پروازیں بحال کرنے کے لیے مؤثر اقدامات کیے۔ اس موقع پر انہوں نے برطانوی ہائی کمشنر برائے پاکستان، یو کے ڈیپارٹمنٹ فار ٹرانسپورٹ، وزارتِ دفاع، پاکستان سول ایوی ایشن اتھارٹی (PCAA) اور پی آئی اے کی کاوشوں کو سراہتے ہوئے ان کا شکریہ ادا کیا۔

انہوں نے مزید کہا کہ یہ موقع پی آئی اے کی بروقت نجکاری کا جشن منانے اور قلیل مدت میں ہونے والی نمایاں بہتری کو تسلیم کرنے کے لیے موزوں ہے۔ ان کے مطابق جلد ہی قوم پی آئی اے کے بیڑے میں اضافے اور برطانیہ، یورپ اور کینیڈا کے مزید مقامات کے لیے براہِ راست پروازوں کی بحالی دیکھے گی۔

خواجہ آصف نے یہ بھی بتایا کہ حکومت امریکہ کی ہوا بازی اتھارٹی کے ساتھ قریبی تعاون کر رہی ہے تاکہ امریکہ کے لیے براہِ راست پروازیں دوبارہ شروع کی جا سکیں۔ انہوں نے کہا کہ ہوا بازی کے شعبے میں کامیاب اصلاحات کے بعد تمام متعلقہ فریقین کے لیے روشن مستقبل کی توقع ہے، جسے بین الاقوامی ہوا بازی ادارے بھی تسلیم کر رہے ہیں۔