ٹرمپ کا پھر یو ٹرن:ایرانی توانائی تنصیبات پر حملے مزید 10 دن کیلئے موخر کرنے کا اعلان

واشنگٹن ڈی سی: امریکی صدر ڈونلڈ ٹرمپ نے ایک دفعہ پھر یو ٹرن لیتے ہوئے ایران کی توانائی تنصیبات پر فضائی حملے مزید 10 دن کے کیلئے موخر کرنے کا اعلان کر دیا۔

تفصیلات کے مطابق اپنے سوشل میڈیا پلیٹ فارم ٹروتھ سوشل پر جاری کر دہ بیان میں امریکی صدر ڈونلڈ ٹرمپ نے کہا ہے کہ وہ 6 اپریل 2026 تک وہ ایران کی توانائی تنصیبات پر حملے روک رہے ہیں۔

بیان میں ڈونلڈ ٹرمپ نے دعویٰ کیا کہ وہ یہ اقدام ایران حکومت کی درخواست پر کر رہے ہیں۔

صدر ٹرمپ نے کہا کہ ایران سے بات چیت جاری ہے اور فیک نیوز میڈیا کی جانب سے جاری خبروں کے برعکس یہ بات چیت عمدگی سے جاری ہے۔

دوسری جانب ایرانی حکام نے امریکا کے ساتھ براہ راست مذاکرات کی تردید کی ہے، جبکہ ایک ایرانی عہدیدار نے امریکی تجویز کو ’’یکطرفہ اور غیر منصفانہ‘‘ قرار دیا ہے۔

خیال رہے کہ اس سے قبل بھی صدر ٹرمپ نے ان تنصیبات پر حملے 5 روز کیلئے روکنے کا اعلان کیا تھا جس کی مدت گذشتہ روز ختم ہو گئی تھی۔