مذاکرات کو آگے بڑھانے کیلئے امریکا کو ایرانی تجاویز کا جواب آج مل جانا چاہیے،مارکو روبیو

روم:امریکی وزیر خارجہ مارکو روبیو نے کہا کہ ایران کی جانب سے تجاویز پر اب تک جواب موصول نہیں ہوا، تاہم واشنگٹن کو توقع ہے کہ آج ایران کا ردعمل سامنے آجائے گا۔

تفصیلات کے مطابق اٹلی کے دارالحکومت روم میں عالمی امور پر پریس کانفرنس کرتے ہوئےامریکی وزیر خارجہ مارکو روبیو نے کہا کہ پوپ لیو کے ساتھ ان کی ملاقات مثبت رہی۔ جبکہ امریکا کیوبا میں مزید امداد پہنچانے کے لیے تیار ہے، تاہم کیوبا کی جانب سے تعاون نہیں کیا جا رہا۔

ایک سوال کے جواب میں انہوں نے کہا کہ نیٹو افواج کی تعیناتی سے متعلق حتمی فیصلہ امریکی صدر ڈونلڈ ٹرمپ کریں گے۔ جبکہ نیٹو کے اندر اصلاحات کا منصوبہ پہلے سے موجود تھا۔

دوران پریس کانفرنس ایران امریکا تعلقات پر بات کرتے ہوئے مارکو روبیو نے کہا کہ امریکا کو ایران کی جانب سے تجاویز کا جواب آج مل جانا چاہیے۔ تاہم ابھی تک کوئی باضابطہ ردعمل موصول نہیں ہوا،انہوں نے امید ظاہر کی کہ ایران کی جانب سے سنجیدہ پیشکش سامنے آئے گی جس سے بامعنی مذاکرات کا آغاز ممکن ہو سکے گا۔

مارکو روبیو نے کہا کہ “آپریشن فریڈم” اور “آپریشن ایپک فیوری” مختلف نوعیت کے آپریشنز ہیں۔ جبکہ جنگ بندی کے باوجود دفاعی اقدامات کا حق برقرار رہتا ہے،انہوں نے مزید کہا کہ اگر امریکی مفادات پر حملہ کیا جاتا ہے تو اس کا جواب دینا ضروری ہوتا ہے۔ ایران کو آبنائے ہرمز پر کنٹرول حاصل کرنے یا سمندری راستوں میں بارودی سرنگیں بچھانے کی اجازت نہیں دی جائے گی۔

میڈیا سے گفتگومیںامریکی وزیر خارجہ نے کہا کہ ایران کی جانب سے امریکی بحریہ کے جہازوں پر حملے کے بعد امریکا نے مؤثر جواب دیا۔ اور مستقبل میں بھی کسی بھی جارحیت کا بھرپور جواب دیا جائے گا۔

خیال رہے کہ اس سے قبل ایرانی حکام نے تصدیق کرتے ہوئے کہا تھا کہ ایران کو امریکی تجاویز موصول ہو گئی ہیں جن کا باریک بینی سے جائزہ لیا جا رہا ہے اور کسی حتمی نتیجے پر پہنچنے کے بعد اسے پاکستانی ثالثوں کے ذریعے واشنگٹن تک پہنچا دیا جائے گا۔