مضبوط پالیسی اقدامات نے پاکستان کی معاشی بحالی کو سہارا دیا، آئی ایم ایف نے رپورٹ جاری کردی

ویب ڈیسک:عالمی مالیاتی فنڈ( آئی ایم ایف) کا کہنا ہے کہ مضبوط پالیسی اقدامات کے تسلسل نے پاکستان کی معاشی بحالی کو ناصرف سہارا دیا بلکہ معیشت کی بیرونی جھٹکوں کے مقابلے میں مزاحمت کو مضبوط کیا۔

تفصیلات کے مطابق آئی ایم ایف نے پاکستان کے لیے توسیعی فنڈ سہولت کے تحت تیسرے جائزے اور لچک و پائیداری سہولت کے دوسرے جائزے کی رپورٹ جاری کردی۔

رپورٹ کے مطابق مالی سال 2026 کی پہلی ششماہی میں جی ڈی پی کی نمو میں تیزی آئی، جبکہ مہنگائی قابو میں رہی، کرنٹ اکاؤنٹ مجموعی طور پر متوازن رہا، اور زرمبادلہ کے ذخائر کی بحالی سابقہ اندازوں سے بہتر رہی۔  

آئی ایم ایف جائزہ رپورٹ میں کہا گیا کہ مشرقِ وسطیٰ میں جنگ کے اثرات نے پاکستان کے قلیل مدت کے معاشی منظرنامے کو غیر یقینی بنا دیا۔

جائزہ رپورٹ کے مطابق یہ واضح نہیں کہ حالات کس سمت جائیں گے،بنیادی منظرنامے کے تحت خدشہ ہے کہ یہ جنگ مہنگائی پر اوپر کی جانب دباؤ ڈالے گی اور معاشی نمو اور ادائیگیوں کے توازن کو متاثر کرے گی، تاہم مجموعی اثرات محدود رہنے کی توقع ہے اس کے باوجود، منفی خطرات بدستور بہت زیادہ ہیں۔