پنجابی فلم ’’عشق بدمعاش‘‘ کا ٹریلر جاری

(عبدالاسلام سے)
کیپیٹل سینما لاہور میں نئی پنجابی فلم ’’عشق بدمعاش‘‘ کے پوسٹر اور ٹریلر کی لانچنگ تقریب منعقد ہوئی، جس میں فلم کی کاسٹ سمیت معروف شوبز شخصیات نے شرکت کی۔

تقریب میں فلم کے ہیرو اداکار حیدر سلطان راہی، اداکارہ دیا جٹ، اچھی خان، فلم ڈائریکٹر مسعود بٹ، نوید پپو، جرار رضوی، جونی ملک، فلم ڈائریکٹر الیاس رانا، فلم پروڈیوسر ملک طارق، صفدر ملک سمیت دیگر فنکاروں اور شوبز سے وابستہ شخصیات نے شرکت کی۔

اس موقع پر اداکار حیدر سلطان راہی اور فلم ڈائریکٹر مسعود بٹ نے فلم ’’عشق بدمعاش‘‘ کے پوسٹر کی رونمائی کی، جبکہ تقریب کے دوران فلم کا ٹریلر بھی پیش کیا گیا۔

میڈیا سے گفتگو کرتے ہوئے فلم ڈائریکٹر مسعود بٹ نے کہا کہ پنجابی فلموں کے دلدادہ افراد آج بھی بڑی تعداد میں موجود ہیں، فلم ’’عشق بدمعاش‘‘ کا موضوع خوبصورت اور منفرد ہے، امید ہے کہ شائقین اسے پسند کریں گے۔

اداکار حیدر سلطان راہی نے کہا کہ ’’عشق بدمعاش‘‘ ایک سچی کہانی پر مبنی فلم ہے، جس میں نئے چہروں کو بھی اپنی صلاحیتیں دکھانے کا موقع دیا گیا ہے۔ انہوں نے کہا کہ فلم کا میوزک بھی بہترین ہے اور شائقین کو فلم سے محظوظ ہونے کا موقع ملے گا۔

فلم کے ڈائریکٹر الیاس رانا نے بتایا کہ ’’عشق بدمعاش‘‘ کی شوٹنگ پنجاب کے مختلف شہروں میں کی گئی ہے اور فلم کی تیاری کے دوران پوری ٹیم نے بھرپور محنت کی ہے۔

فلم کی نمایاں کاسٹ میں حیدر سلطان راہی، دیا جٹ، جہانگیر جانی اور سیف علی خان سمیت دیگر فنکار شامل ہیں، جبکہ فلم کی ہدایات الیاس رانا نے دی ہیں اور پروڈیوسر ملک طارق ہیں۔

فلم کی ٹریلر لانچنگ تقریب میں موجود فنکاروں نے امید ظاہر کی کہ ’’عشق بدمعاش‘‘ پنجابی فلموں کے شائقین کو پسند آئے گی اور سینما گھروں میں اچھی پذیرائی حاصل کرے گی۔

عشق بدمعاش فلم 14 اگست کو ملک بھر کے سینما گھروں میں نمائش کے لیے پیش کی جائے گی۔