ایران نے انسانی حقوق کی خلاف ورزیوں کے الزام میں 20 امریکیوں پر پابندیاں لگا دیں

غیر ملکی خبر رساں ادارے کے مطابق  ایران کے انسانی حقوق کے دفتر کے سیکرٹری جنرل کاظم غریب آبادی نے بھی کہا کہ امریکی حکومت کو انسانی حقوق کا بینر اٹھانے اور اس بنیاد پر ریاستوں کے خلاف پابندیاں لگانے کا حق نہیں ہے۔

 عدلیہ کے نائب برائے بین الاقوامی امور اور انسانی حقوق اور ایران کے انسانی حقوق کے دفتر کے سیکرٹری جنرل کاظم غریب آبادی نے پیر کو کہا کہ ایرانی حکام نے 20 سے زائد امریکی شہریوں کو انسانی حقوق کی خلاف ورزیوں سے متعلق اپنی پابندیوں کی فہرست میں شامل کیا ہے۔

"امریکی حکومت کو یہ حق نہیں ہے کہ وہ انسانی حقوق کا بینر اٹھائے اور اس بنیاد پر ریاستوں کے خلاف پابندیاں عائد کرے۔ اس سے آگے بڑھتے ہوئے ہم نے امریکہ میں ایسے افراد اور قانونی اداروں کو ،جو انسانی حقوق کی خلاف ورزیوں میں ملوث ہیں کو پابندیوں کی فہرست میں شامل کرنے کا فیصلہ کیا۔

غریب آبادی کے مطابق، "اس فہرست میں 20 سے زیادہ افراد اور قانونی ادارے شامل ہیں۔" انہوں نے مزید کہا کہ "اگر ہمارے پاس امریکہ پر پابندیاں لگانے کے لیے مضبوط مالی بنیاد نہیں ہے تو بھی ہم کم از کم ایسے لوگوں کا نام لے سکتے ہیں جو انسانی حقوق کی خلاف ورزی کرتے ہیں"۔

9 دسمبر کو غریب آبادی نے اعلان کیا کہ ایرانی حکام ان کمپنیوں اور امریکی شہریوں کی پابندیوں کی فہرست تیار کرنے جا رہے ہیں جو انسانی حقوق کی سنگین خلاف ورزیوں میں ملوث ہیں۔

خیال رہے کہ  7 دسمبر کو امریکی محکمہ خزانہ نے ایران کے خلاف نئی پابندیاں عائد کر دیں۔ اس بار پابندیوں سے سات ایرانی افراد اور ملک کے دو قانون نافذ کرنے والے ادارے متاثر ہوئے۔ جیسا کہ محکمہ خارجہ نے واضح کیا ہے، CAATSA (کاونٹرنگ امریکاز ایڈورسیز تھرو سینکشنز ایکٹ) کے سیکشن 106 کے مطابق پابندیاں دو افراد کے خلاف متعارف کرائی گئی ہیں، جو واشنگٹن کے مطابق، ایران میں بین الاقوامی طور پر تسلیم شدہ انسانی حقوق کی خلاف ورزیوں کے ذمہ دار ہیں۔