2021 کا سال محمدرضوان کے نام

تفصیلات کے مطابق رواں سال محمد رضوان کے لیے کئی لحاظ سے یادگار رہا لیکن خصوصاً ٹی20 کرکٹ میں اپنی عمدہ کارکردگی سے انہوں نے نئی تاریخ رقم کردی اور متعدد ریکارڈز اپنے نام کر لیے۔

محمدرضوان نے رواں سال ٹی20 میں مجموعی طور پر 2ہزار سے زائد رنز اسکور کیے اور یہ سنگ میل عبور کرنے والے دنیا کے پہلے بلے باز بن گئے۔

رضوان نے مجموعی طور پر 2ہزار 36 رنز اسکور کیے جس میں ایک سنچری اور 17 نصف سنچریاں شامل ہیں۔

محمدرضوان نے رواں سال ایک کیلنڈر ایئر میں سب سے زیادہ انٹرنیشنل رنز کا عالمی ریکارڈ بھی بنا دیا اور مجموعی طور پر انٹرنیشنل ٹی20 کرکٹ میں اس سال ایک ہزار 326 رنز بنائے جبکہ بابر اعظم 939رنز کے ساتھ دوسرے نمبر پر رہے۔

بابر اعظم اور محمد رضوان اب تک بحیثیت اوپنر چھ سنچری شراکت قائم کر چکے ہیں جو ایک عالمی ریکارڈ ہے۔

اس سے قبل سب سے زیادہ پانچ سنچری شراکتوں کا ریکارڈ بھارتی جوڑی لوکیش راہول اور روہت شرما کے پاس تھا۔

پاکستان کی ٹی20 کرکٹ کی تاریخ میں اب تک 4 مرتبہ 150رنز سے زائد کی شراکت قائم ہوئی ہے اور چاروں مرتبہ یہ کارنامہ اسی جوڑی نے انجام دیا۔