جمعرات کے روز اس حوالے سے منعقدہ ایک تقریب میں وزیر اعظم کا کہنا تھا کہ بیرون ممالک میں مقیم پاکستانی ملک کا بڑا اثاثہ ہیں، روشن ڈیجیٹل اکاؤنٹس پروگرام کے تحت صرف 5 ماہ میں 97 ملکوں سے 88 ہزار اکاؤنٹ کھول چکے ہیں، جس سے پاکستان کو 500 ملین ڈالر کا ہدف حاصل ہو چکا ہے۔ عمران خان کا مزید کہنا تھا کہ جب تک روپیہ مضبوط نہیں ہوگا معیشت مضبوط نہیں ہوسکتی ۔

ڈالر کی اہمیت پاکستان کے لیے آکسیجن جیسی ہے، وزیر اعظم کے مطابق موجودہ حکومت نے 6ہزار ارب روپےکا قرض اتارا ہے۔ اور دوسری خبر یہ ہے کہ گزشتہ سال کے مقابلے میں 5 ارب ڈالر یعنی 1000 ارب روپے اضافہ بھی ہو گیا ہے ۔

سچ یہ ہے کہ موجودہ حالات میں پاکستانی معیشت کی جان " ڈالر" میں ہے ۔ اور یہ ڈالر بیرون ممالک میں مقیم پاکستانیوں سے حاصل کر کے ہی یہاں 24 کروڑ پاکستانیوں کی زندگی میں معاشی انقلاب لایا جاسکتا ہے۔ اس لیے ذرائع ابلاغ کو روشن پاکستان اکاؤنٹ کی زیادہ سے زیادہ تشہیر کی ضرورت ہے۔ اس میں پاکستان اور بیرون ملک مقیم پاکستانیوں کے لیے فائدہ ہی فائدہ ہے۔ یہ سکیم ہے کیا؟ روشن ڈیجیٹل اکاؤنٹ کا اجراء کئی بینکوں نے کیا جس کی بدولت گھر بیٹھے ملک کے 9 بڑے بینکوں میں غیر ملکی کرنسی یا پاکستانی روپے میں بیرون ملک مقیم پاکستانی اور پاکستان میں مقیم ایسے شہری جن کے بیرون ملک اثاثے ڈیکلئر ہیں اپنا آن لائن اکاؤنٹ کھلوا سکتے ہیں۔ اور اس اکاؤنٹ سے نیا پاکستان سرٹیفکیٹ، اسٹاک ایکسچینج، ٹریژری بلز وغیرہ میں سرمایہ کاری کر سکتے ہیں۔ بعد میں اس اکاؤنٹ سے بجلی اور گیس کے بلز بھی ادا کیے جا سکیں گے ۔ اکاؤنٹ کھلوانے کے لیے آپ کو اپنی تصویر، شناختی کارڈ، پاسپورٹ یا بیرون ملک قیام کے دستاویزات جمع کرنا ہوں گے ۔ روشن ڈیجیٹل اکاؤنٹ کا دوسرا نام "دور رہ کر بھی پاس" رکھا گیا ہے جو بیرون ملک مقیم پاکستانیوں کی ملک سے وابستگی ظاہر کرتا ہے ۔ اس پہلے بیرون ملک مقیم پاکستانیوں کے لیے پاکستان میں اپنا اکاؤنٹ کھولنا ایک نہایت مشکل کام تھا ، جس کے ان کا پاکستان میں موجود ہونا ضروری تھا، لیکن اب وہ روشن ڈیجیٹل اکاؤنٹ کے ذرایعے دنیا کے کسی بھی حصے میں گھر بیٹھے صرف 48 گھنٹے میں اپنا اکاؤنٹ کھول کر پاکستان کی نئی پرکشش سکیموں میں غیر ملکی کرنسی اور پاکستان سرمایہ کاری کر سکتے ہیں۔

نیا پاکستان سرٹیفکیٹ میں ڈالر میں 5 سالہ مدت کے لیے سرمایہ کاری پر منافع ساتھ فیصد اور6 ماہ کی سرمایہ کاری پر 6 فیصد ہے ۔ جبکہ پاکستانی روپے میں 5سالہ مدت کے لیے سرمایہ کاری پر منافع 11 فیصد اور 6 ماہ کے لیے سرمایہ کاری پر منافع 10 فیصد ہے ۔ موجودہ حالات میں محفوظ سرمایہ کاری پر اتنا پرکشش منافع دنیا میں کہیں نہیں مل سکتا اور یہی وجہ ہے کہ بیرون ملک مقیم پاکستانیوں نے روشن ڈیجیٹل اکاؤنٹ میں 5 مہینوں میں 500 ارب ڈالر کی سرمایہ کاری کی ہے جو ان کے اعتماد کا مظہر ہے ۔ پاکستان دنیا کے ان چند ممالک میں شامل ہے جنہوں نے اپنے شہریوں ڈیجیٹل آن لائن بینکنگ کی سہولت فراہم کی ہے۔