نگران وزیراعظم انوار الحق کاکڑ کا دورہ متحدہ عرب امارات اختتام پذیرہوگیا۔وزیر اعظم کویت کے سرکاری دورے پر ابو ظہبی کے البطین ہوائی اڈے سے کویت سٹی کے لئے روانہ ہو گئے جہاں کویتی قیادت سے ملاقاتوں کے علاوہ نگران وزیراعظم کی موجودگی میں افرادی قوت، انفارمیشن ٹیکنالوجی، معدنیات و کان کنی، غذائی تحفظ، توانائی اور دفاع کے شعبوں میں باہمی تعاون کی مفاہمتی یادداشتوں پر دستخط بھی ہوں گے۔

وزیر اعظم آفس کے میڈیا ونگ سے جاری بیان کے مطابق ہوائی اڈے پر متحدہ عرب امارات کے وزیر توانائی و انفراسٹرکچرسہیل محمد المزروعی اور پاکستانی سفارتی عملے نے نگران وزیر اعظم کو رخصت کیا۔ دورہ کویت کے دوران نگران وزیرِ اعظم ولی عہد کویت شيخ مشعل الاحمد الجابر الصباح اور وزیرِ اعظم شيخ احمد النواف الاحمد الصباح سے ملاقات کریں گے۔

دورے کے دوران دونوں ممالک کے مابین اقتصادی و معاشی تعاون کے نئے دور کا آغاز ہوگا اور مختلف شعبوں جن میں افرادی قوت، انفارمیشن ٹیکنالوجی، معدنیات و کان کنی، غذائی تحفظ، توانائی اور دفاع کے شعبوں میں باہمی تعاون کی مفاہمتی یادداشتوں پر دستخط ہوں گے۔

نگران وفاقی وزیر برائے نجکاری فواد حسن فواد نے کہا ہے کہ مشکل معاشی حالات کے باوجود پی آئی اے سی ایل کی نجکاری کا عمل جلد مکمل کر لیا جائے گا ۔ وزارت نجکاری کی جانب سے جاری اعلامیہ کے مطابق نجکاری کمیشن اور پاکستان انٹرنیشنل ایئرلائنز کارپوریشن (پی آئی اے سی ایل) کی نجکاری کے لیے تعینات مالیاتی مشیر کے درمیان نگران وفاقی وزیر برائے نجکاری فواد حسن فواد کی موجودگی میں مالیاتی خدمات کے معاہدے (فنانشل سروسز ایگریمنٹ، FASA) پر دستخط ہوئے۔

اس موقع پر نگران وفاقی وزیر برائے نجکاری فواد حسن فواد نے کہا ہے کہ مشکل معاشی حالات کے باوجود پی آئی اے سی ایل کی نجکاری کا عمل جلد مکمل کر لیا جائے گا ۔ انہوں نے کہا کہ فنانشل ایڈوائزر پی آئی اے سی ایل کی مجوزہ نجکاری کے لیے قانونی، تکنیکی اور مالیاتی درستگی، ادارے کی تنظیم نو اور منصفانہ قیمت کے تعین کا ذمہ دار ہوگا۔

وفاقی وزیر نے اس امید اور خواہش کا اظہار کیا کہ مشکل معاشی حالات کے باوجود یہ نجکاری کامیابی سے انجام پائے گی۔ انہوں نے فنانشل ایڈوائزر کو اس عمل میں شامل تمام اداروں کے مکمل تعاون کی یقین دہانی کرائی تاکہ ان کے کام میں آسانی پیدا ہو اور وہ اپنے کام کو بہترین ممکنہ مفاد میں بغیر کسی رکاوٹ کے انجام دے سکیں۔

نگران وزیراعظم انوار الحق کاکڑنے  آج ابوظہبی میں شیخ زاید جامع مسجد کا دورہ کیا ۔

وزیراعظم نے دورے کے آغاز میں شیخ زاید بن سلطان النہیان کے مقبرے پر فاتحہ پڑھی اور متحدہ عرب امارات کے بانی کی بے مثال قیادت کو یاد کیا۔ جن کی بدولت دنیا کی مختلف اقوام کے درمیان رواداری اور پرامن بقائے باہمی کا جذبہ پروان چڑھا۔

انہوں نے پاکستانی عوام اور قیادت کے ساتھ شیخ زاید کے قریبی تعلق کا ذکر کیا۔

وزیراعظم کو اس دورے میں مسجدکے اس عظیم پیغام کے بارے میں بتایا گیا جس میں دوسری ثقافتوں کے لئے بقائے باہمی، رواداری اور فراخدلی کے جذبے کو اجاگر کیا گیا ہے۔

انہیں مسجد کے اس عظیم کردار کے بارے میں بتایاگیا جس کا مقصد اسلامی ثقافت کی حقیقی روح کی ترجمانی کرنا اور دنیابھر میں مختلف ثقافتوں کے درمیان رابطوں کو فروغ دینا ہے۔شیخ زاید جامع مسجد جدید اسلامی فن تعمیر کا ایک شاہکار ہے جس میں چالیس ہزار سے زائدنمازیوں کی گنجائش ہے۔شیخ زاید مسجد متحدہ عرب امارات کی سب سے بڑی اور دنیا کی تیسری سب سے بڑی مسجد ہے۔پنجاب کے نگران وزیر اعلیٰ سید محسن نقوی اور متحدہ عرب امارات میں پاکستان کے سفیر فیصل نیاز ترمذی بھی وزیراعظم کے ساتھ تھے۔