امریکی اڈے دوبارہ نشانے پر آ سکتے ہیں، ایران کی امریکا کو دو ٹوک تنبیہ

ایران کے سپریم لیڈر آیت اللہ علی خامنہ ای نے امریکا کو سخت تنبیہ کرتے ہوئے کہا ہے کہ مشرقِ وسطیٰ میں امریکی فوجی اڈے دوبارہ حملوں کا نشانہ بن سکتے ہیں۔

غیر ملکی میڈیا رپورٹس کے مطابق، آیت اللہ خامنہ ای نے گزشتہ ماہ قطر کے العدید ایئر بیس پر ایرانی حملے کا حوالہ دیتے ہوئے کہا کہ یہ ایک معمولی واقعہ نہیں بلکہ "بڑا کارنامہ" تھا، اور اگر ضرورت پڑی تو ایسا حملہ دوبارہ بھی کیا جا سکتا ہے۔

سپریم لیڈر کا کہنا تھا کہ ایران کو خطے میں موجود امریکی تنصیبات تک پہنچنے کی مکمل صلاحیت حاصل ہے، اور وہ وقت آنے پر اس صلاحیت کو استعمال کرنے میں ہچکچاہٹ نہیں کرے گا۔

یاد رہے کہ گزشتہ روز امریکی محکمہ دفاع (پینٹاگون) نے بھی حملے کی باضابطہ تصدیق کی تھی، جس کے مطابق 23 جون کو ایران کی جانب سے فائر کیا گیا بیلسٹک میزائل قطر میں واقع العدید فضائی اڈے کے ایک اہم مواصلاتی ڈوم پر گرا تھا۔

اس حملے کے بعد منظر عام پر آنے والی سیٹلائٹ تصاویر میں تنصیب کو شدید نقصان پہنچنے کے شواہد دیکھے گئے ہیں۔

امریکی چیئرمین جوائنٹ چیفس آف اسٹاف، جنرل ڈین کین نے بھی اس حملے پر ردِعمل دیتے ہوئے کہا کہ امریکی انٹیلیجنس کو حملے سے متعلق پیشگی اطلاع حاصل تھی، جس کے باعث ضروری حفاظتی اقدامات بروقت کر لیے گئے تھے۔