مدینہ منورہ: نگران وزیراعظم انوار الحق کاکڑ مسجد نبویﷺ گئے جہاں انہوں نے روضہ رسولﷺ پر حاضری دی ،نوافل ادا کئے اور دعائیں مانگیں۔

جمعرات کو وزیراعظم آفس کے میڈیا ونگ کی جانب سے جاری بیان کے مطابق نگران وزیراعظم نے مسجد نبویﷺ سے ملحقہ عالمی میلے اور سیرت نبویﷺ اور اسلامی تہذیب سے متعلقہ عجائب گھرکا دورہ کیا۔ میوزیم کے بورڈ آف ڈائریکٹرز کے سیکرٹری ڈاکٹر ناصرمسفیرالزہرانی نے ان کا پرتپاک استقبال کیا۔

وزیراعظم کو دورہ کے موقع پر تاریخی عجائب گھر کے بارے میں جامع بریفنگ دی گئی جس میں نبی آخرالزمانﷺ کی زندگی اور تعلیمات کے ساتھ ساتھ اسلامی تہذیب کو بھی اجاگرکیا گیا ہے۔ وزیراعظم نے میوزیم کو سراہتے ہوئے اسلامی ورثے کے تحفظ اوراسے نمایاں کرنے کےلئے کی گئی کاوشوں کو سراہا۔

ڈاکٹر ناصرمسفیر الزہرانی نے وزیراعظم کوشیلڈ اور کتابیں پیش کیں جو پاکستان اورسعودی عرب کے درمیان اسلامی ورثے اور باہمی افہام وتفہیم کے فروغ کے رشتے کی علامت ہے۔ مدینہ منورہ میں عالمی میلہ اور میوزیم پیغمبر اسلام حضرت محمدﷺ کی زندگی اوراسلامی تہذیب نمایاں کرنے کے لئے کلیدی اہمیت کا حامل ہے۔

یہ میوزیم نمائشوں اور ملٹی میڈیا پریزینٹیشنز کے ساتھ ایک عمیق تجربہ پیش کرتا ہے اور پیغمبر اسلام حضرت محمد ﷺ سے متعلق تاریخ ، اہم واقعات اورتعلیمات پر روشنی ڈالتا ہے، اس میوزیم میں مختلف شعبوں میں اسلامی تہذیب کی کامیابیوں کو بھی دکھایا گیا ہے، میوزیم بین المذاہب مقالمے،افہام و تفہیم کو فروغ اورمتنوع عقائد اور تقاضوں کے احترام کے فروغ کا مرکز ہے۔\932

کابل: بلومبرگ کی ایک رپورٹ میں افغان کرنسی کو 2023 کی تیسری سہ ماہی کی بہترین کرنسی قرار دیا گیا ہے۔

رپورٹ کے مطابق افغان کرنسی "افغانی" 2023 کی اب تک کی تیسری مضبوط ترین کرنسی ہے۔

اربوں ڈالر کی انسانی امداد اور ایشیائی ممالک کے ساتھ بڑھتی ہوئی تجارت نے اس سہ ماہی میں افغان کرنسی کو عالمی درجہ بندی میں سب سے اوپر دھکیل دیا ہے۔

بلومبرگ کی رپورٹ کے مطابق غربت کے شکار ملک کے لیے یہ ایک غیر معمولی قدم ہے، اگست 2021 میں کابل پر دوبارہ کنٹرول حاصل کرنے کے بعد، طالبان نے کرنسی کی تجارت کو روک دیا۔

بلومبرگ کی رپورٹ میں کہا گیا ہے کہ افغانوں کو امریکی ڈالر اور پاکستانی روپے استعمال کرنے سے روک دیا گیا ہے، افغانی کرنسی نے افغانی کو فروغ دینے کے لیے آن لائن تجارت پر پابندی لگا دی جس سے کرنسی مضبوط ہوئی ہے۔

بلومبرگ نے مزید کہا کہ کولمبیا پیسو اور سری لنکن روپیہ افغان کرنسی سے بہتر ہے۔

خیبرپختونخوا: پاکستان کے محکمہ موسمیات (پی ایم ڈی) نے خیبرپختونخوا کے متعدد اضلاع میں بارش اور برفباری کی پیشگوئی کی ہے۔

محکمہ نے آج شام سے شروع ہونے والی بارش اور تیز ہواؤں کے ایک نئے دور کی پیش گوئی کی ہے اور بالائی اضلاع میں ممکنہ برف باری کے ساتھ 30 ستمبر تک جاری رہے گی۔

28 سے 30 ستمبر تک بارش کے متوقع علاقوں میں چترال، دیر، ایبٹ آباد اور جی بی شامل ہیں۔

اس کے علاوہ اسلام آباد، راولپنڈی، پشاور، ژوب، بارکھان، ڈیرہ غازی خان، ملتان، بہاولپور اور بہاولنگر میں 28 سے 29 ستمبر تک بارش کا امکان ہے۔

ان بارشوں کے نتیجے میں درجہ حرارت میں نمایاں کمی کا امکان ہے۔

پراونشل ڈیزاسٹر مینجمنٹ اتھارٹی (PDMA) نے متوقع بارشوں کی وجہ سے بالائی اضلاع میں ممکنہ لینڈ سلائیڈنگ اور نشیبی علاقوں میں شہری سیلاب کے حوالے سے وارننگ جاری کی ہے۔

پی ڈی ایم اے نے ضلعی انتظامیہ کو چوکس رہنے کی ہدایت کی ہے اور موسم سے متعلق کسی بھی صورت حال کا جواب دینے کے لیے تیار ہیں۔