بنگلا دیش کے نومنتخب وزیر اعظم طارق رحمان نے حلف اٹھا لیا

ڈھاکہ: بنگلا دیش کے نو منتخب وزیراعظم طارق رحمان نے حلف اٹھالیا۔

غیر ملکی میڈیا رپورٹس کے مطابق دارالحکومت ڈھاکہ میں نئی حکومت کی حلف برداری کی تقریب ہوئی،پاکستان کی جانب سے وفاقی وزیراحسن اقبال تقریب حلف برداری میں شریک ہوئے۔

بنگلہ دیش کے صدر محمد شہاب الدین نے جاتیہ سنگساد بھابھن کے ساؤتھ پلازہ میں طارق رحمان سے عہدے کا حلف لیا۔

قبل ازیں  بی این پی کے ارکانِ پارلیمنٹ نے متفقہ طور پر طارق رحمان کو قائدِ ایوان اور وزیرِاعظم منتخب کیا۔

دوسری جانب بنگلا دیش کے عبوری سربراہ اور نوبیل امن انعام یافتہ رہنما محمد یونس نے قوم سے الوداعی خطاب میں اپنے عہدے سے مستعفی ہونے کا اعلان کر دیا۔

اس موقع پرانہوں نے اقتدار منتخب حکومت کے حوالے کرتے ہوئے کہا کہ جمہوریت، آزادیٔ اظہار اور بنیادی حقوق کا سفر جاری رہنا چاہیے، ان کا کہنا تھا کہ عبوری حکومت آج اپنی ذمہ داریاں مکمل کر رہی ہے اور عوام کے فیصلے کا احترام کرتے ہوئے اقتدار نئی منتخب قیادت کو منتقل کیا جا رہا ہے۔

خیال رہے گزشتہ ہفتے ہونے والے عام انتخابات میں بی این پی نے بھاری اکثریت سے کامیابی حاصل کی تھی۔