اومی کرون : خیبر پختونخوا ہیلتھ ایمرجنسی میں مزید 3 ماہ کی توسیع

تفصیلات کے مطابق محکمہ صحت کی جانب سے جاری کردہ اعلامیے کے مطابق کورونا کی پانچویں لہر کے پیش نظرخیبرپختونخوا میں ہیلتھ ایمرجنسی میں 3 ماہ کی توسیع کر دی گئی ہے ۔ توسیع اومی کرون ویرینٹ سے پیدا صورتحال کی وجہ سے کی گئی ہے ۔

اعلامیے کے مطابق رواں سال 31 مارچ تک ہیلتھ ایمرجنسی نافذ رہیگی، صوبے میں نافذ ہیلتھ ایمرجنسی 31 دسمبر 2021 کو ختم ہونا تھی۔

دوسری جانب نیشنل کمانڈ اینڈ آپریشن سینٹر کے تازہ ترین اعدادوشمار کے مطابق کورونا وائرس سے 2 افراد جاں بحق ہوگئے، جس کے بعد اموات کی تعداد 28 ہزار 945 ہوگئی۔ پاکستان میں کورونا کے تصدیق شدہ کیسز کی تعداد 12 لاکھ 97 ہزار 865 ہوگئی۔

این سی او سی کے مطابق  گزشتہ چوبیس گھنٹوں میں ملک بھر میں 44 ہزار 198کورونا ٹیسٹ کیے گئے اور مثبت کیسز کی شرح 1.42 فیصد رہی۔