وزیراعظم کا کیچ حملے کے شہداء کو خراج عقیدت 

تفصیلات کے مطابق وزیراعظم عمران خان نے گزشتہ روز بلوچستان کے علاقے  کیچ میں سیکیورٹی فورسز کی چیک پوسٹ پر دہشت گردوں کے حملے  کے شہدا کو خراج عقیدت پیش کیا ہے ۔  

سماجی رابطے کی ویب سائٹ ٹوئٹر پر پیغا م میں  وزیراعظم عمران  خان نے  کہا کہ ہمارے جری  جوان  ہمیں دہشتگردوں سے بچانے کے لئے مسلسل اپنی جانوں کا نذرانہ پیش کررہے ہیں۔ ان 10 شہید فوجی جوانوں کوسلام پیش کرتا ہوں جنہوں نے کیچ بلوچستان میں چیک پوسٹ پردہشتگردوں کا حملہ ناکام بنایا۔

وزیراعظم عمران  خان نے مزید کہا کہ ہم پاکستان کوہرقسم کی دہشتگردی سے پاک کرنے کے عزم کا اعادہ کرتے ہیں۔

ہمارےجری جوان ہمیں دہشتگردوں سےبچانےکیلئے پیہم اپنی جانوں کے نذرانےپیش کررہےہیں۔میں کیچ،بلوچستان میں حفاظتی چوکی پر دہشت گردوں کاحملہ پسپاکرتےہوئے رتبۂ شہادت پر فائز ہونےوالےجوانوں کوسلام پیش کرتا ہوں۔مادرِوطن کو ہرقسم کی دہشتگردی سےپاک کرنےکے اپنےعزم پر ہم پوری پختگی سےقائم ہیں۔

— Imran Khan (@ImranKhanPTI) January 28, 2022

واضح رہے کہ  گزشتہ روز بلوچستان کے علاقے  کیچ میں سیکیورٹی فورسز کی چیک پوسٹ پر دہشت گردوں کے حملے میں 10 جوان شہید ہوگئے ۔ آئی ایس پی آر کے مطابق بلوچستان کے علاقے کیچ میں سیکیورٹی فورسز کی چیک پوسٹ پر دہشت گردوں نے 25 اور 26 جنوری کی درمیانی رات حملہ کیا۔

پاک فوج کے شعبہ تعلقات عامہ (آئی ایس پی آر) کے مطابق دہشت گردوں کے ساتھ فائرنگ کے تبادلے میں ایک دہشت گرد ہلاک ہوگیا۔ آئی ایس پی آر کے مطابق سیکیورٹی فورسز کی جوابی کارروائی میں 3 دہشت گرد گرفتار اور متعدد زخمی ہوگئے ہیں جبکہ کلیئرنس آپریشن تاحال جاری ہے۔واقعہ کے ذمہ داروں کو انجام تک پہنچانے کے لئے آپریشن جاری رہے گا۔