ملکہ برطانیہ ہیری سے چند روز میں فون پر رابطہ کریں گی

تفصیلات کے مطابق برطانوی میڈیا نے دعویٰ کیا ہے کہ ملکہ برطانیہ  اپنے پوتے شہزادہ ہیری سے معاملات سلجھانے کی کوشش کریں گی ، جبکہ  ہیری اور میگھن کے متنازع انٹرویو پر شاہی عملے کو خاموش رہنے کی ہدایت کی گئی ہے۔  یاد  رہے کہ ہیری اور میگھن مارکل نے انٹرویو میں ملکہ برطانیہ کی  کافی تعریفیں کی تھیں۔میگھن مارکل نے اوپرا ونفرے کو دیئے گئے انٹرویو میں انکشاف کیا تھا کہ شاہی خاندان کے ایک فرد نے آرچی کی رنگت کے بارے میں سوال کیا تھا۔ انٹرویو میں میگھن مارکل نے کہا تھا کہ انہیں شاہی خاندان کی جانب سے تحفظ نہیں ملا اور شاہی خاندان کا حصہ بننے کے بعد خاموش کروا دیا گیا تھا۔

گزشتہ روز شہزادہ ہیری اور ان کی اہلیہ میگھن کے انٹرویوز کے بعد برطانوی شاہی محل بکنگھم پیلس سے ملکہ برطانیہ الزبتھ کا پیغام  بھی جاری کیا گیا  تھا جس میں ملکہ برطانیہ نے کہا کہ انہیں شاہی جوڑے کو چند سال سے درپیش چیلنجز کا سن کر دکھ ہوا ہے اور شہزادہ ہیری کے الزامات کا معاملہ نجی طور پر نمٹایا جائے گا۔انہوں نے کہا کہ جوڑے کو نسل سے متعلق مسائل تشویشناک ہیں۔ ہیری، میگھن اور ان کے بیٹے آرچی کو بطور فیملی ممبرز ہمیشہ چاہا جائے گا۔

 واضح رہے کہ میگھن مارکل اور شہزادہ ہیری کے حالیہ نشر ہونے والے انٹرویو میں میگھن نے شاہی خاندان کے کئی راز افشا کیے ہیں۔امریکی ٹی وی میزبان اوپرا ونفری کے ساتھ شہزادہ ہیری اور میگھن مارکل کے انٹرویو کے بعد برطانوی شاہی خاندان کا ایک ہنگامی اجلاس ہوچکا ہے  جس میں کئی سینیئر افراد نے شرکت کی۔انٹرویو میں میگھن مارکل نے انکشاف کیا تھا کہ جب وہ شاہی خاندان کا حصہ تھیں تو انھوں نے خودکشی کے بارے میں سوچا تھا اور جب انھوں نے مدد مانگی تو انھیں کوئی سہارا نہیں ملا تھا۔