کل کے سینیٹ کے اجلاس کے لیے پریذائیڈنگ افسر مقرر

تفصیلا ت کے مطابق  کل کے سینٹ  کے اجلاس کے لیے پریذائیڈنگ افسر مقرر کردیا گیا۔ صدر مملکت ڈاکٹر عارف علوی  نے پریڈائیڈینگ افسر کی منظوری دیدی ۔سینٹ اجلاس کی صدارت جے ڈی اے کے سینیٹر مظفر حسین شاہ کریں گے ،  مظفر حسین شاہ نئے اراکین سینیٹرز سے حلف لیں گے۔چیرمین اور ڈپٹی چیرمین کا انتخاب سینیٹر مظفر حسین شاہ کروائیں گے۔

پاکستان تحریک انصاف اور اتحادیوں کی جانب سے  چیئرمین سینیٹ کیلئے صادق سنجرانی کو نامزد کیا ہے۔ مرزا آفریدی  حکومت کی جانب سے ڈپٹی چیئرمین سینیٹ کے امیدوار ہیں،  وزیراعظم عمران خان نے مرزا محمد آفریدی کونامزد کیا ہے ۔

دوسری جانب پی ڈی ایم کے  سربراہی اجلاس میں  پاکستان ڈیموکریٹک موومنٹ (پی ڈی ایم ) نے چیئرمین سینیٹ کیلئے سابق وزیر اعظم یوسف رضا گیلانی کے نام کی منظوری دے تھی۔ پی ڈی ایم کے اجلاس میں باہمی مشاوات سے یوسف رضا گیلانی کو چیرمین سینیٹ اور عبدالغفور حیدری کو ڈپٹی چیئرمین سینیٹ کے لیے امیدوار نامزد کیا گیا ہے ۔عبدالغفور حیدری پی ڈی ایم کے امیدوار اور یوسف رضا گیلانی کے پینل سے ہوں گے۔مولانا  فضل الرحمان نے عبدالغفور حیدری کے نام کی منظوری دی تھی۔

خیال رہے کہ  چیئرمین سینیٹ کا الیکشن کل شیڈول ہے، جہاں پی ڈی ایم کے امیدوار یوسف رضا گیلانی اور حکومتی امیدوار صادق سنجرانی مد مقابل ہیں۔ پی ڈی ایم امیدوار یوسف رضا گیلانی اور مولانا عبدالغفور حیدری نے کاغذات نامزدگی حاصل کرلئے۔

واضح رہے کہ سینیٹ انتخابات چئیرمین اور ڈپٹی چئیرمین سینیٹ کا انتخاب خفیہ بیلٹ کے ذریعے ہو گا  جبکہ  سینٹ سے 52 سینیٹرز آج ریٹائر ہو جائیں گے جن میں کئی شخصیات دوبارہ منتخب ہو نے میں کامیاب ہو گئی ہیں۔ 48 نو منتخب ارکان سینیٹ کل حلف اٹھائیں گے جن میں تحریک انصاف کے 19، پیپلز پارٹی کے 8، بلوچستان عوامی پارٹی کے 6، مسلم لیگ (ن) کے 5، جمیعت علما اسلام ف کے 3 جب کہ ایم کیو ایم ، بی این پی مینگل اور اے این پی کے 2،2    اور مسلم لیگ ق کا ایک رکن شامل ہے۔ نو منتخب ارکان سینیٹ 12 مارچ کو 6 سال کی مدت یعنی 2021 سے 2027 تک کے لیے بطور سینیٹر حلف اٹھائیں گے۔