اپوزیشن کاصادق سنجرانی سے دستبردارہونےکامطالبہ

پارلیمنٹ ہاؤس کے باہر پیپلز پارٹی کے رہنما مصطفی نواز کھوکھر کے ہمراہ میڈیا سے گفتگو کرتے ہوئے مسلم لیگ ن کی رہنما مصدق ملک نے کہا کہ میں اور مصطفیٰ نواز پولنگ بوتھ کا جائزہ لینے گئے، اندر دو خفیہ کیمرے لگے تھے، ایک کیمرے کا رخ پرچی اور دوسرے کا رخ بندے کی طرف تھا۔ انہوں نے انکشاف کیا کہ ایک لیمپ بھی پڑا ہے جس کے اندر کئی سوراخ ہیں ۔ خدشہ ہے اس لیمپ میں بھی کچھ گڑبڑ ہےہماری موجودگی میں اس لیمپ کو کھولا جائے۔ سینیٹر مصدق ملک نے کہا کہ بتایا جائے یہ کیمرے کس کے حکم پر لگے، اس اقدام سے سپریم کورٹ کے فیصلے کی دھجیاں اڑائیگی ہیں ۔ 

اس موقع پر مصطفی نوازکھوکھر نے کہا کہ ہم نے پولنگ بوتھ کے اندر اور باہر کیمرے ریکور کئے، دیکھنا ہوگا یہ سیکورٹی میں کس نے خلل ڈالا، ان کا کہنا تھا کہ سیکورٹی کی چئیرمین سینیٹ کی ذمے داری تھی ، صادق سنجرانی خود اس الیکشن کے امیدوار ہینان کی چوری پکڑی گئی، اس معاملے پر ہم مشاورت کریں گے، فیصلہ کریں گے کہ اس کی تحقیقات خود سینیٹ کرے یا پولیس کرے۔ 

واضح رہے کہ نماز جمعہ کے بعد چیئرمین سینیٹ اور ڈپٹی چیئرمین کا انتخاب کیا جائے گا۔ سینیٹ کے چیئرمین کے انتخاب کیلئے حکومت کی جانب سے صادق سنجرانی کو اپنا اُمیدوار نامزد کیا گیا ہے جبکہ اپوزیشن اپنے امیدوار یوسف رضا گیلانی کو اِس عہدے پر دیکھنا چاہتی ہے۔ سینیٹ کی موجود صورتحال کے تناظر میں اپوزیشن اتحاد کے پاس 51 اراکین کی اکثریت اور حکومتی اتحاد کے پاس 47 اراکین ہیں،لہٰذا اس الیکشن میں ایک ایک ووٹ کی اہمیت بہت زیادہ ہے۔