عادی، سند یافتہ ووٹ چور ہر بار ووٹ چوری کا نیا طریقہ ڈھونڈ کر لاتا ہے : مریم نواز

تفصیلات کے مطابق مسلم لیگ نون کی نائب صدر مریم نواز نے سماجی رابطے کی ویب سائٹ ٹوئٹر پر مرحلہ وار  پیغام  میں کہا کہ ان   سند یافتہ ووٹ چوروں کی حالت اتنی پتلی ہو چکی ہے کہ ایجنسیوں سے فون کروا کر،گن پوائنٹ پر ووٹ لینے سے بھی بات نہیں بنی اور کیمرے لگا کر اپنے ہی ارکان کی جاسوسی کرنی پڑ گئی۔انہوں نے اس ا قدام کو تاریخی ذلت قرار دے دیا ۔  

عادی، سند یافتہ ووٹ چور ہر بار ووٹ چوری کا نیا طریقہ ڈھونڈ کر لاتا ہے مگر رنگے ہاتھوں پکڑا جاتا ہے۔ مگر اب حالت اتنی پتلی ہو چکی ہے کہ ایجنسیوں سے فون کروا کر،گن پوائنٹ پر ووٹ لینے سے بھی بات نہیں بنی اور کیمرے لگا کر اپنے ہی ارکان کی جاسوسی کرنی پڑ گئی۔ ایسی تاریخی ذلت! توبہ !

— Maryam Nawaz Sharif (@MaryamNSharif) March 12, 2021

نائب صدر مسلم لیگ ن مریم نواز نے ایک اور  ٹوئٹ میں لکھا کہ آر ٹی ایس،ڈسکہ دھند کے بعد سینیٹ پر ڈاکہ ڈالنے والے آخری جنگ ہار چکے ہیں ، انہوں نے  سپریم کورٹ سے منہ کی کھائی، آئینی ترمیم میں ناکام رہے، صدارتی آرڈیننس ردی کا ٹکڑا بن گیا تو خفیہ کیمروں والے مستری لے آئے، آئین میں خفیہ ووٹ کا ذکر ہے خفیہ کیمروں کا نہیں،    ووٹ چورو شرم کرو اور کرسی چھوڑو۔

آر ٹی ایس اور ڈسکہ دھند کے بعد سینیٹ پر ڈاکہ ڈالنے والے آخری جنگ ہار چکے۔ سپریم کورٹ سے منہ کی کھائی، آئینی ترمیم میں ناکام رہے،صدارتی آرڈینینس ردی کا ٹکڑا بن گیا تو خفیہ کیمروں والے مستری لے آئے۔ آئین میں خفیہ ووٹ کا ذکر ہے خفیہ کیمروں کا نہیں! ووٹ چورو شرم کرو اور کرسی چھوڑو!

— Maryam Nawaz Sharif (@MaryamNSharif) March 12, 2021

یاد  رہے کہ آج صبح    سینیٹ اجلاس کے دوران سینیٹ ہال میں ووٹنگ والی جگہ پر کیمرہ اور خفیہ ڈیوائس برآمدہوئی ، جس پر حکومت اور اپوزیشن ایک دوسرے پر الزام لگا رہی ہے۔ اپوزیشن نے پولنگ بوتھ میں کیمرہ لگا ہونے پر شدید احتجاج کیا اور بوتھ اکھاڑ کر سیکریٹری سینیٹ کی نشست پر رکھ دیا جس کے بعد پریزائیڈنگ آفیسر مظفر حسین شاہ  کی ہدایت پر  پولنگ بوتھ دوبارہ بنا دیا گیا  ہے ۔

واضح رہے کہ چیئرمین سینیٹ کے انتخاب کیلئے معرکہ آج لگے گا ، حکومتی اتحاد کے پاس 47 اور اپوزیشن کے پاس 51 ارکان ہیں ۔ جماعت اسلامی نے کسی کو بھی ووٹ نہ دینے کا اعلان کیا ہے۔  حکومتی امیدوار صادق سنجرانی اور پی ڈی ایم کے یوسف رضا گیلانی آمنے سامنے ہیں جبکہ   ڈپٹی چیئرمین  سینیٹ کیلئے  عبدالغفور حیدری اور مرزا آفریدی  میدان میں ہیں  ۔