مولانا فضل الرحمان کا جمعہ کو یوم تشکر منانے کا اعلان

سپریم کورٹ کے باہر میڈیا سے گفتگو کرتے ہوئے مولانا فضل الرحمان نے کہا کہ کل پورے ملک کے کونے، کونے میں یوم تشکر منایا جائے گا، یوم تحفظ آئین پاکستان کو یوم تشکرمیں تبدیل کیا جا رہا ہے، یہ قوم کی فتح ہے، عدلیہ نے قوم کی امیدوں پر پورا اترتے ہوئے بڑا اطیمنان بخش فیصلہ دیا ہے۔

انہوں نے کہا کہ پوری قوم کو مبارکباد دیتا ہوں، جمہوریت آئین اور عوام کی فتح ہے، عدلیہ قوم کی امیدوں پر پوری اتری ہے، کل یوم احتجاج نہیں یوم تشکر ہوگا، پاکستان کے استحکام کے لئے دعا کریں گے، اللہ پاک پاکستان کو معاشی اور دیگر مشکلات سے نکالے۔

دوسری طرف قومی اسمبلی میں اپوزیشن لیڈر قومی اسمبلی شہباز شریف نے کہا کہ آج عدالت نے آئین کو بحال کیا اور پارلیمنٹ کو مضبوط کیا ہے۔

قومی اسمبلی میں قائد حزب اختلاف شہباز شریف نے کہا کہ ہم نے عوام کے ساتھ مل کر غربت و مہنگائی کے خلاف جنگ لڑنی ہے۔

انہوں نے کہا کہ آج اللہ تعالیٰ کا جتنا شکر ادا کریں، اتنا کم ہے، ہم آپ کو اصلی سرپرائز دیں گے، جعلی نہیں۔

ان کا کہنا تھا کہ اللہ نے 22 کروڑ عوام کی دعائیں قبول کیں، عدالت نے ایسا فیصلہ دیا آئین اور پاکستان بچ گیا، عدلیہ نے اپنے فیصلے سے چار چاند لگائے، عدالت نے پارلیمان کو مضبوط کیا ہے، یہ رمضان میں عوام نے بہت بڑا معرکہ سرکیا ہے، غربت، مہنگائی کے خلاف ہم مل کر لڑیں گے، اللہ کا جتنا شکر ادا کریں کم ہے۔

شہباز شریف نے صحافی کے سوال کا جواب دیتے ہوئے کہا کہ بلاول بھٹو تشریف لا رہے ہیں، قوم یوم نجات منائے گی، ہم جعلی نہیں اصلی سرپرائز دیں گے۔