وزیرا عظم عمران خان کا قوم کے نام اہم پیغام

وزیر اعظم عمران خان نے سماجی رابطے کی ویب سائیٹ ٹوئیٹر پر قوم کے نام اہم پیغام جاری کیا ہے جس میں ان کا کہنا ہے کہ وہ پاکستان کے لیے آخری بال تک لڑتے رہیں گے۔

اپنے ٹوئیٹ میں وزیر اعظم عمران نے کہا کہ انہوں نے کل وفاقی کابینہ اور پارلیمانی پارٹی کا اجلاس طلب کیا ہے۔

اپنے پیغام میں انہوں نے یہ بھی کہا کہ کل وہ قوم سے خطاب کریں گے۔

I have called a cabinet mtg tomorrow as well as our parl party mtg; & tomorrow evening I will address the nation. My message to our nation is I have always & will continue to fight for Pak till the last ball.

— Imran Khan (@ImranKhanPTI) April 7, 2022

اس سے قبل ٹوئیٹر پر جاری پیغام میں وفاقی وزیر فواد چودھری نے بھی کہا تھا کہ وزیر اعظم عمران خان نے کل کابینہ کا اجلاس طلب کر لیا ہے۔

اپنے ٹوئیٹ میں ان کا کہنا تھا کہ کل کابینہ اور پارلیمانی کمیٹی کا اجلاس ہوگا جبکہ وزیر اعظم عمران خان قوم سے خطاب بھی کریں گے۔

وزیر اعظم نے کل کابینہ کا اجلاس طلب کر لیا ہے، پارلیمانی کمیٹی کا اجلاس بھی کل ہو گا اور کل رات وزیر اعظم قوم سے خطاب کریں گے

— Ch Fawad Hussain (@fawadchaudhry) April 7, 2022

یاد رہے چیف جسٹس پاکستان عمرعطاء بندیال کی سربراہی میں سپریم کورٹ کے پانچ رکنی بنچ نے تحریک عدم اعتماد پرڈپٹی اسپیکر کی رولنگ کے خلاف ازخود نوٹس کیس کا فیصلہ سنا دیا ہے۔

لارجر بینچ میں جسٹس اعجاز الاحسن، جسٹس منیب اختر، جسٹس مظہر عالم میاں خیل اور جسٹس جمال خان مندوخیل شامل تھے۔ سپریم کورٹ کے پانچ رکنی بینج نے ڈپٹی اسپیکر کی رولنگ کے خلاف فیصلہ 0-5 کی متفقہ رائے سے سنایا۔

عدالت نے اپنے فیصلے میں ڈپٹی اسپیکر کی رولنگ کو غیر آئینی قرار دے دیا ہے۔

عدالت نے صدر مملکت کا اسمبلیاں تحلیل کرنے کا حکم بھی کالعدم قرار دیتے ہوئے کہا کہ وزیراعظم عمران خان صدر مملکت کو اسمبلیاں توڑنے کی ایڈوائس نہیں کرسکتے تھے۔

سپریم کورٹ کی جانب سے سنائے گئے فیصلے میں کہا گیا کہ وزیراعظم اسمبلیاں تحلیل کرنے کے اہل نہیں تھے جب کہ عدالت نے صدر مملکت ڈاکٹر عارف علوی کے نگراں حکومت کے احکامات بھی کالعدم قرار دے دیے۔

عدالتی فیصلے میں اسپیکر قومی اسمبلی کو 9 اپریل بروز ہفتہ صبح 10 بجے اجلاس طلب کرنے کا حکم دیتے ہوئے کہا گیا ہے کہ وہ اسی دن عدم اعتماد پر ووٹنگ کروائیں۔

عدالت فیصلے میں نئے انتخابات کے حکم کو بھی کالعدم قرار دے دیا گیا ہے۔

عدالت نے متقفہ فیصلے میں کہا کہ کسی ممبر کو ووٹ کاسٹ کرنے سے روکا نہیں جائے گا جب کہ تحریک عدم اعتماد ناکام ہو تو حکومت اپنے امور انجام دیتی رہے اور تحریک عدم اعتماد منظور ہو جاتی ہے تو اسمبلی نئے وزیر اعظم کا انتخاب کرے۔