تحریک عدم اعتماد پر ووٹنگ آج ہوگی

تفصیلات کے مطابق وزیرِ اعظم عمران خان کے خلاف تحریکِ عدم اعتماد کی قرار داد پر ووٹنگ کے لیے قومی اسمبلی کا اجلاس کچھ دیر میں ہو گا۔

اپوزیشن نے ڈپٹی اسپیکر قاسم سوری کے خلاف بھی تحریک عدم اعتماد جمع کرادی ہے اور کہا کہ ڈپٹی اسپیکر نے آئینی اور جمہوری روایات پامال کیں، قاسم سوری کا 3 اپریل کا اقدام آرٹیکل 6 کے زمرے میں آتا ہے. آج کی سیاسی صورتحال سے متعلق متحدہ اپوزیشن کا پارلیمانی پارٹی اجلاس شہباز شریف کی زیر صدارت صبح 9 بجے طلب کرلیا گیا ہے۔

قومی اسمبلی سیکریٹریٹ کا کہنا ہے کہ تحریک عدم اعتماد پر ووٹنگ ہر صورت آج ہوگی ۔ خط کے معاملے پر ایوان میں بحث نہیں کی جاسکتی، اسپیکر قومی اسمبلی کوئی اور ایجنڈا نہیں لے سکتے ۔ 

اس سلسلے میں وفاقی دارالحکومت اسلام آباد کا ریڈ زون مکمل طور پر سیل کر دیا گیا، پولیس کے مطابق صرف مارگلہ روڈ کا راستہ کھلا رکھا جائے گا ، ریڈ زون کے اطراف احتجاج یا جشن کے لیے لوگوں کو جمع نہیں ہونے دیا جائے گا۔