وزیراعظم نے پشاور موڑ تا اسلام آباد انٹرنیشنل ائرپورٹ میٹروبس منصوبے کا افتتاح کردیا 

تفصیلات کے مطابق وزیراعظم شہباز شریف نے  عوام کو مبارکباد دیتے ہوئے کہاکہ قوم کی خدمت کا سفر اب تیزی سے جاری رہے گا۔   انہوں نے کہا کہ رمضان کے مقدس مہینے میں مفت سفر کی سہولت فراہم کریں گے۔

شہباز شریف  نے کہا کہ بیرونی قرضوں پر سود کی ادائیگی ملکی معیشت کیلئے بڑا چیلنج ہے ، سابق حکومت کو غریب سے کوئی غرض نہیں تھی، بدقسمتی سے ملکی اخراجات قرضوں پر چل رہے ہیں ، اسلام آباد کے شہریوں کو یہ تحفہ نواز شریف نے 2017 میں دیا، اس منصوبے کو 2018 میں آپریشنل ہونا تھا۔

انہوں نے کہا کہ حکومت بدلنے پر یہ منصوبہ بھی دیگر کی طرح تاخیر کا شکارہوا، منصوبے کا اصل تخمینہ 16 ارب تھا، منصوبےمیں تعطل کی کوئی وجہ نہیں تھی، منصوبے کیلئے فنڈز موجود تھے،کمی تھی تو کام کرنے کی، ان کو عوام کا درد ہوتا تو یہ منصوبہ 4 سال تو کیا 4 گھنٹے بھی تاخیر کا شکار نہ ہوتا.

وزیراعظم نے کہاکہ بدقسمتی سے ملکی اخراجات قرضوں سے چلا رہے ہیں، سابق وزیراعظم کے پاس ہیلی کاپٹر، وزرا کے پاس بلٹ پروف گاڑیاں تھیں، سابق حکمرانوں کو عوام سے کوئی غرض نہیں تھی، ان کو کیا غرض تھی کہ غریب کے بچے نے اسکول جانا ہے۔

خیال رہے کہ عوامی مفاد کے اس منصوبے سے 50 ہزار شہریوں کو یومیہ سفری سہولت میسر ہوگی۔

وزیراعظم شہباز شریف نے   کچھ  روز قبل  التوا کا شکار پشاور موڑ تا نیواسلام آبادایئرپورٹ میٹروبس سروس منصوبےکا دورہ کیا تھا ،  وزیراعظم نے منصوبے کے التوا سے تعلق انکوائری کا حکم دیتے ہوئے منصوبے کی جلد ازجلد تکمیل کا حکم  دیا تھا ۔