وزیر اعظم کورونا کا شکار ، کون کون سی اہم شخصیات کے کورونا ٹیسٹ کیے جائیں گے؟

تفصیلات کے مطابق   وزیر اعظم عمران خان  کورونا ٹیسٹ مثبت آنے کے بعد  حکومتی سرگرمیاں گھر سے جاری رکھیں گے،وزیراعظم اہم اجلاسوں کی صدارت ویڈیو لنک سے کریں گے۔

جی این این کے مطابق  وزیراعظم ہاوس اور بنی گالہ گھر میں معاون عملہ کے کورونا ٹیسٹ کئے جائیں گے، وزیر اعظم کے سیکرٹری اعظم خان کا کورونا ٹیسٹ بھی کرایا جائے گا، وزیراعظم کے ملٹری سیکرٹری سمیت تمام ملازمین کے کورونا ٹیسٹ کئے جائیں گے۔

وزیرا علیٰ خیبر پختونخوا محمود خان  اور وزیر مواصلات مراد سعید سمیت دیگر معاون خصّوصی اپنے اپنے کورونا ٹیسٹ کرائیں گے،وزیرا عظم سے ملاقاتیں کرنے والے وزراء اور دیگر حکومتی شخصیات بھی اپنا کورونا ٹیسٹ کرائیں گے،وزیر اعظم کی آئندہ ہفتے کی مصروفیات انکی صحت دیکھ کر طے کی جائیں گی،کئی وفاقی وزراء، معاونین، مشیران اور سیکیورٹی عملہ کے ٹیسٹ بھی ہوں گے۔

خیال رہے کہ  وزیر اعظم عمران خان کا کورونا ٹیسٹ مثبت آیا تھا جس کے بعد وزیر اعظم عمران خان نے خود کو گھر میں قرنطینہ کرلیا ہے۔

چنددن قبل  وزیراعظم عمران خان نے بھی کورونا ویکسین لگوائی تھی۔وزیر اعظم عمران خان نے قوم سے اپیل کرتے ہوئے کہا  تھا کہ  کورونا وبا کی تیسری لہر کے پیش نظر ایس اوپیز پر مکمل عمل درآمد کو یقینی بنایا جائے ،ملک بھر میں کورونا ویکسین لگانے کی مہم جاری ہے۔ وزیراعظم نے کہا کہ  پہلے مرحلے میں ساٹھ سال اور اس سے زائد عمر کے افراد اور فرنٹ لائن ورکرز کو کورونا ویکسین فراہم کی جارہی ہے۔

اس سے  قبل  صدر مملکت ڈاکٹر عارف علوی اور ان کی اہلیہ ثمینہ عارف کو وفاقی دارالحکومت کے ترلئی کے علاقے میں ایک ویکسینیشن سنٹر میں کورونا ویکسین لگائی  گئی تھی۔