این اے 249ضمنی الیکشن ،مسلم لیگ ن نے پیپلزپارٹی سے حمایت مانگ لی

تفصیلات کے مطابق  چیئرمین پیپلزپارٹی بلاول بھٹو زرداری سے سابق وزیراعظم شاہد خاقان عباسی نے بلاول ہاؤس میں ملاقات کی ہے۔ بلاول بھٹو زرداری اور شاہد خاقان عباسی کے درمیان ملاقات کے موقع پر شیری رحمان، نوید قمر اور مفتاح اسماعیل بھی موجود تھے۔

بلاول بھٹو اورشاہد خاقان عباسی کےدرمیان این اے 249 کے ضمنی انتخابات کےحوالے سے تبادلہ خیال کیا گیا، بلاول بھٹوسے شاہد خاقان نےاین اے 249 میں ن لیگ کے امیدوار کیلئے پی پی پی کی جانب سے حمایت مانگ لی۔بلاول بھٹو نے جواب دیا کہ  میں پارٹی سے مشاورت کے بعد آپ کو آگاہ کروں گا۔

گزشتہ روز ریجنل الیکشن کمشنر کراچی نے قومی اسمبلی کے حلقہ این اے 249 کے ضمنی انتخاب میں پولنگ اسٹیشنز پر فوج اور رینجرز تعینات کرنے کی درخواست کی تھی۔

واضح رہے کہ این اے 249 کے ضمنی انتخاب کے لیے مجموعی طور پر 55 امیدواروں نے کاغذات نامزدگی جمع کرائے تھے، جن کی اسکروٹنی کا عمل جاری ہے اور 25 مارچ تک اس کی جانچ پڑتال جاری رہے گی، ریٹرننگ آفیسر کے فیصلوں کے خلاف اپیل جمع کرانے کی آخری تاریخ 29 مارچ ہے، جب کہ اپیلٹ ٹریبونل میں اپیل کے فیصلوں کی آخری تاریخ 5 اپریل مقرر کی گئی ہے۔کاغذات نامزدگی 7 اپریل تک واپس لیے جا سکتے ہیں، امیدواروں کو انتخابی نشان 8 اپریل کو الاٹ کیے جائیں گے، جب کہ این اے 249 کے ضمنی انتخاب کے لیے پولنگ 29 اپریل کو ہوگی۔