امریکی صدر جوبائیڈن کی صدر مملکت عارف علوی کو یومِ پاکستان کی مبارکباد

تفصیلا ت کے مطابق امریکی صدر جوبائیڈن نے عہدے سنبھالنے کے بعد پہلی مرتبہ پاکستانی قیادت سے رابطہ کیا ہے کہ اور اپنے پاکستانی ہم منصب عارف علوی کو خط لکھ کر یوم پاکستان کی خصوصی مبارکباد دی ہے ،خط میں امریکی صدر کی جانب سے کہا گیا کہ پاکستان امریکا پارٹنر شپ علاقائی امن و خوشحالی کے مشترکہ مقصد پر مبنی ہے ، افغانستان میں قیام امن اور کورونا وبا پر قابو پانے کے لیے تعاون جاری رکھیں گے،ماحولیاتی تبدیلی اور مشترکہ چیلنجز پر قابوپانے کے لیے بھی تعاون جاری رہے گا،ہم پاکستان کے ساتھ شراکت داری کو مستقبل میں مضبوط بنائیں گے۔ 

واضح رہے کہ ملک بھر میں 81 واں یوم پاکستان آج ملی جوش و جذبے سے منایا جا رہا ہے۔23 مارچ کی مناسبت سے ملک بھر میں عام تعطیل کا اعلان کیا گیا ہے۔یوم پاکستان کے تاریخ سازدن کے آغاز پاک فوج کی جانب سے توپوں کی سلامی سے ہوا، لاہور اور پشاور میں21،21 توپوں کی سلامی کے ساتھ یوم پاکستان کا آغاز ہوا۔ لاہور میں محفوظ شہید گیریژن میں یہ سلامی دی گئی۔ اس موقع پر فضا نعرہ تکبیر- اللہ اکبر اور پاکستان زندہ باد کے نعروں سے گونج اٹھی۔نماز فجر کے بعد ملکی سلامتی و خوشحالی کے لیے خصوصی دعائیں مانگی گئیں۔