پشاور میں کورونا ضابطہ اخلاق کی خلاف ورزی پر کریک ڈاؤن

ڈپٹی کمشنر پشاورکیپٹن(ر) خالد محمودکے مطابق رات کے اوقات میں کورونا ضابطہ اخلاق کی خلاف ورزی پر کریک ڈاؤن کیا گیا ۔ اسسٹنٹ کمشنر سید نعمان علی شاہ نے ایڈیشنل اسسٹنٹ کمشنر محمد شفیق آفریدی کے ہمراہ رنگ روڈ، یونیورسٹی روڈ اور صدر میں بازاروں کا معائنہ کیا،انتظامی افسران نے کورونا ضابطہ اخلاق پر عمل درآمد کو یقینی بنایا،اور کورونا ضابطہ اخلاق کی خلاف ورزی پر 29 ریسٹورنٹس کے منیجرز کو گرفتارکیا۔ 

ڈپٹی کمشنر پشاورنے بتایا کہ رات 8 بجے کے بعد کمرشل سرگرمیاں جاری رکھنے پر 18 دکانداروں کو بھی گرفتار کیا گیا ۔ انہوں نے کہا کہ صوبائی حکومت کے احکامات پر صرف  میڈیسن و اشیاء خوردونوش اور دیگر ضروری دکانوں و کاروبار  کو رات آٹھ کے بعد بھی کھولنے کی اجازت ہے۔ڈپٹی کمشنر کا مزید کہنا تھا کہ تاجران حکومتی ضابطہ اخلاق پر عمل درآمد کریں،خلاف ورزی پر قانونی کارروائی عمل میں لائی جائے گی۔