عمران خان کا راہداری ضمانت کیلئے پشاور ہائیکورٹ سے رجوع

ذرائع کے مطابق چئیرمین تحریک انصاف  عمران خان ہائیکورٹ میں درخواست دائر کرنے کے بعد وزیر اعلیٰ ہاؤس واپس روانہ ہوگئے۔

 ذرائع کا کہنا ہے کہ  پشاور ہائیکورٹ نے پی ٹی آئی چیئرمین کی جانب سے دائر راہداری ضمانت کی درخواست فوری سماعت کے لئے منظور  کرلی ہے۔

عمران خان کی درخواست پر چیف جسٹس پشاور ہائیکورٹ کچھ دیر میں سماعت کریں گے ۔ ذرائع کا بتانا ہے کہ درخواست کی سماعت کے لئے عمران خان دوبارہ پشاور ہائیکورٹ جائیں گے۔

یاد رہے عمران خان پر 25 مئی کےلانگ مارچ پراسلام آباد کے تھانوں میں مقدمات درج ہیں ، مقدمات میں عمران خان کے علاوہ اسد عمر،شیریں مزاری،زرتاج گل ، خرم نواز، شاہ محمودقریشی ،علی امین گنڈا پور کا نام بھی نامزد کیا گیا تھا۔

مقدمات اسلام آباد کے تھانہ کراچی کمپنی ،آبپارہ تھانہ ،ترنول، کوہسار، بھارہ کہو، تھانا رمنا، سیکرٹریٹ ، لوہی بھیر میں درج کئے گئے جبکہ متعدد تھانوں میں 2 مقدمات بھی درج ہوئے ہیں۔

مقدمات میں راستوں کی بندش، کارسررکار مداخلت ،پولیس اہلکاروں پرحملہ ،املاک کو نقصان پہنچانے کی دفعات شامل کی گئی تھیں۔