پاکستان اور ترکی کے تعلقات کو مزید مضبوط اور مستحکم کرنا چاہتے ہیں : وزیراعظم 

ترک سرکاری ٹی وی کو انٹرویو دیتے ہوئے وزیراعظم  شہباز شریف کا کہنا تھا کہ  پاک ترک دوستی صدیوں  پر محیط ہے ، پاکستان اور ترکی کے تعلقات کو مزید مضبوط اور مستحکم کرنا چاہتے ہیں ،  ترکی کے دوست ہمارے دوست، ترکی کے دشمن ہمارے دشمن ہیں۔ 

انہوں نے کہا کہ  پن بجلی کے منصوبوں کو خصوصی اہمیت دے رہے ہیں ، پاکستان میں متبادل توانائی کے منصوبوں پر غور کررہے ہیں،  سی پیک، ون بیلٹ روڈ خطے کی ترقی کا اہم پروجیکٹ ہے، پاکستان ،چین اور ترکی ون بیلٹ منصوبے میں شراکت داری سے اہم کامیابیاں حاصل کرسکتے ہیں۔

انٹرویو میں وزیراعظم شہبازشریف  نے مزید کہا کہ ترک صدر کے ساتھ بات چیت کا دور انتہائی مثبت رہا ، ہمسایہ  ممالک کے ساتھ معاملات بات چیت سے حل کرنا چاہتے ہیں۔ جب تک مسئلہ کشمیر حل نہیں ہوتا، خطے میں پائیدار امن قائم نہیں ہوسکتا، پاکستان نے دہشت گردی کے خلاف بے پناہ قربانیاں دیں ہیں۔ 

ان کا کہنا تھا کہ  یوکرین مسئلے کا حل بھی بات چیت سے ہی ممکن ہے، گزشتہ 60 سال سے اسرائیلی فورسز فلسطینوں پر ظلم روا رکھے ہوئے ہیں، کشمیریوں اور فلسطینوں کے حقوق کی جدوجہد میں انکے ساتھ کھڑے ہیں ، جب تک کشمیریوں اور فلسطینوں کو حقوق نہیں مل جاتے، خطے میں پائیدار امن ممکن نہیں، دنیا میں اس وقت تک امن قائم نہیں ہوسکتا جب تک کشمیر اور فلسطین کا مسئلہ حل نہیں ہوجاتا، مسلمانان برصغیر نے روز اول سے ہی تحریک خلافت کی حمایت کی ہے۔

وزیراعظم کا مزید کہنا تھا کہ پاکستان میں حکومت کی تبدیلی قانونی اور آئینی طریقے سے ہوئی ہے، حکومت کی تبدیلی تحریک عدم اعتماد سے ہوئی جو کہ آئینی راستہ ہے، معاشرے کے کمزور طبقے کی سبسڈی کے ذریعے مدد کررہے ہیں۔