وزیراعظم ایک روزہ دورے پر گوادر پہنچ گئے

تفصیلات کے مطابق وزیر اعظم پاکستان میاں محمد شہباز شریف اپنے پہلے ایک روزہ دورے پر کوئٹہ سے گوادر پہنچ گئے  ۔ وزیراعلیٰ بلوچستان عبدالقدوس بزنجو اور دیگر سرکاری شخصیات نے وزیراعظم شہباز شریف کا ایئرپورٹ پر استقبال کیا۔

سرکاری ذرائع کے مطابق وزیراعظم شہباز شریف گوادر کی نئی تعمیر شدہ بندرگاہ کا  فضائی دورہ کریں گے ۔ وزیراعظم اور وفاقی کابینہ کے ارکان کو گوادر ڈویلپمنٹ اتھارٹی کی جانب سے بریفنگ دی جائے گی۔

وزیراعظم گوادر میں مختلف منصوبوں کا دورہ کریں گے جبکہ مختلف عمائدین و  مقامی شخصیات بھی ان سے ملاقات کریں گی ، گوادر کی ترقی میں سرگرم چینی اداروں کے عہدیدار بھی وزیر اعظم سے ملاقات کریں گے۔

سرکاری ذرائع کے مطابق وزیراعظم کے دورے میں گوادر کی ترقی کے حوالے سے اہم فیصلے متوقع ہیں۔  وزیراعظم شہباز شریف کے دورۂ گوادر کے حوالے سے سیکیورٹی اداروں کی جانب سے سخت حفاظتی انتظامات کیے گئے ہیں۔

واضح رہے کہ وزیر اعظم شہباز شریف گوادر کا ایک روزہ دورہ مکمل کرکے آج ہی واپس وفاقی دارالحکومت اسلام آباد روانہ ہو جائیں گے۔