پاکستان مشکل کی اس گھڑی میں اپنے افغان بھائیوں کے شانہ بشانہ کھڑاہے : وزیراعظم

تفصیلات کے مطابق  وزیراعظم نے افغان عبوری حکومت کے قائم مقام وزیراعظم ملامحمد حسن اخوند سے ٹیلی فون پر رابطہ کیا ،  انہوں نے افغانستان میں تباہ کن زلزلے میں قیمتی انسانی جانوں کے ضیاع اوراملاک کے نقصان پرپاکستان کی حکومت اورعوام کی طرف سے گہری ہمدردی اورتعزیت کااظہارکیا۔

انہوں نے کہا کہ پاکستان مشکل کی اس گھڑی میں اپنے افغان بھائیوں کے شانہ بشانہ کھڑاہے۔

وزیراعظم نے بتایا کہ سرحدپرغلام خان اورانگوراڈاکے سرحدی مقامات شدیدزخمیوں کو پاکستان میں علاج کے لئے لانے کے لئے کھول دیئے گئے ہیں۔

انہوں نے شدیدانسانی بحران کاسامناکرنے والے افغان عوام کو مسلسل امداد فراہم کرنے کے پاکستان کے عزم کااعادہ کیا۔

وزیراعظم نے تجارت کی سہولت اورلوگوں کی نقل وحمل کے لئے پاکستان کی طرف سے کئے گئے اقدامات کواجاگرکرتے ہوئے کہاکہ پاکستان نے امن ،ترقی اورخوشحالی کے فروغ کے لئے دوطرفہ تعلقات کومستحکم بنانے کاتہیہ کررکھاہے۔