عمران ریاض خان کی گرفتاری سیدھا سوموٹو کا کیس ہے:بابر اعوان

سماجی رابطے کی ویب سائیٹ ٹوئیٹر پر جاری پیغام میں سابق وفاقی وزیر قانون بابر اعوان نے کہا کہ عمران ریاض خان کو عدالتی پروٹیکشن کی موجودگی میں گرفتار کرنے کا مطلب ہے، بنیادی حقوق ختم، شہری آزادیاں سلب۔

انہوں نے صحافی کی گرفتاری کو غیر قانونی قرار دیتے ہوئے کہا امپورٹڈ حکومت ایسٹ انڈیا کمپنی سے بھی آگے نکل گئی ہے،

یہ سیدھا سوموٹو کا کیس ہے۔ عمران ریاض خان کو عدالتی پروٹکشن کی موجودگی میں گرفتار کرنے کا مطلب ہے، بنیادی حقوق ختم، شہری آزادیاں سلب۔ امپورٹڈ حکومت، ایسٹ انڈیا کمپنی سے بھی آگے نکل گئی۔ غیرقانونی گرفتاری قابلِ مذمت ہے۔

— Babar Awan (@BabarAwanPK) July 5, 2022

واضح رہے کہ سینئر اینکر پرسن عمران ریاض خان کو پشاور سے اسلام آباد جاتے ہوئے پولیس کی جانب سے اسلام آباد ٹول پلازہ پر گرفتار کیا گیا ہے۔

پولیس کے مطابق عمران ریاض کے خلاف پنجاب کی حدود اٹک میں ایف آئی آردرج ہے، عمران ریاض خان کو پولیس اسٹیشن منتقل کیا جا رہا ہے۔

دوسری جانب سوشل میڈیا پر سینئر صحافیوں، تحریک انصاف کے رہنماؤں اور دیگر صارفین کی جانب سے عمران ریاض خان کی گرفتاری کی مذمت کی جا رہی ہے۔

رہنما تحریک انصاف اسد عمر نے کہا کہ عمران ریاض خان کی گرفتاری قابلِ مذمت ہے، رائے کے اظہار کا جواب دلیل سے دیا جاتا ہے گرفتاری سے نہیں۔

پی ٹی آئی فرخ حبیب نے عمران ریاض کی گرفتاری کی مذمت کرتے ہوئے کہا کہ اختلاف رائے کو ایسے طاقت کے زور پر دبایا نہیں جاسکتا۔