آسٹریلیا نے دورہ پاکستان کیلئے 17 رکنی اسکواڈ کا اعلان کر دیا

سڈنی: آسٹریلوی کرکٹ بورڈ نے دورہ پاکستان کے لیے 17 رکنی ٹی ٹوئنٹی اسکواڈ کا اعلان کر دیا ہے۔

تفصیلات کے مطابق 3 ٹی ٹوئنٹی میچز کی سیریز کے لیے پاکستان کا دورہ کرنے والی آسٹریلوی ٹیم کی قیادت مچل مارش کریں گے۔

اسکواڈ میں شین ایبٹ، زیوئیر بارلیٹ، ماہلی بئیرڈمین ، کوپر کنولی ، بین ڈارشیوس ، جیک ایڈورڈز اور کیمرون گرین شامل ہیں،جبکہ اسکواڈ کے دیگر کھلاڑیوں میں ٹریوس ہیڈ، جوش انگلس، میتھیو کہنیمن، مچ اوون، جوش فلپس ، میتھیو رنشا ، میتھیو شارٹ، مارکوس اسٹوئنس اور ایڈم زمپا بھی شامل ہیں۔

پاکستان کے خلاف سیریز کے لیے ماہلی بیئرڈمین اور جیک ایڈورڈز کو پہلی بار اسکواڈ میں شامل کیا گیا،  میتھیو رینشا بھی ٹی ٹوئنٹی میں اپنا ڈیبیو کریں گے۔

خیال رہے کہ ٹی ٹوئنٹی ورلڈکپ کے لیے اسکواڈ میں شامل 5 کھلاڑیوں کو پاکستان کے خلاف سیریز کے لیے آرام دیاگیا ہے۔

اس حوالے سےکرکٹ آسٹریلیا کا کہنا ہے کہ ورلڈکپ اسکواڈ میں شامل پٹ کمنز، جوش ہیزل ووڈ اور ٹم ڈیوڈ کو فٹنس کے لیے مزید وقت دیا گیا۔

واضح رہے کہ آئی سی سی ٹی ٹوئنٹی ورلڈ کپ کی تیاریوں کے سلسلے میں پاکستان اور آسٹریلیا کی ٹیموں کے درمیان3  ٹی ٹوئنٹی میچز کی سیریز قذافی اسٹیڈیم لاہور میں کھیلی جائے گی۔

دونوں ٹیموں کے درمیان 3 ٹی ٹوئنٹی میچز کی سیریز رواں ماہ کے آخر میں کھیلی جائےگی، میچز 29 اور 31 جنوری جبکہ آخری میچ یکم فروری کو کھیلا جائے گا۔