بلوچستان میں بارشوں سے تباہی ، کوئٹہ آفت زدہ قرار

پی ڈی ایم اے کے مطابق کوئٹہ سمیت بلوچستان کے مختلف علاقوں میں دو روز سے جاری بارش نے تباہی مچادی ہے ،  جس سے کوئٹہ، خضدار اور آواران زیادہ متاثر ہوئے ہیں ۔

بارشوں کے سبب دیواریں گرنے، کرنٹ لگنے اور سیلابی ریلے میں بہہ جانے سے مختلف واقعات و حادثات میں اب تک 30 سے زائد افراد جاں بحق ہوچکے  ہیں ۔

منگل کی شب طوفانی بارش کے بعد ضلع قلعہ سیف اللہ سے تقریباً 20 کلومیٹر دور پہاڑی علاقے خسنوب جلال زئی میں سیلابی ریلہ آبادی میں داخل ہوگیا اور متعدد افراد کو بہا لے گیا ۔ مقامی تیز سیلابی ریلے سے بچنے کے لیے علاقے کے لوگوں نے قریبی پہاڑ اور بلند مقامات پر پناہ لے لی ہے۔

گذشتہ روز صوبائی ڈیزاسٹر منیجمنٹ اتھارٹی (پی ڈی ایم اے) نے بارشوں سے ہونے والی تباہی کے بعد کوئٹہ کو آفت زدہ علاقہ قرار دے دیا تھا۔

پاکستان میں صوبہ بلوچستان کے شہر کوئٹہ سمیت بلوچستان کے بیشتر اضلاع میں مزید طوفانی بارشوں کی پیشگوئی ہے۔  پی ڈی ایم اے کی جانب سے  جاری   مراسلے میں 7 جولائی تک شدید بارشوں کی پیشگوئی کی گئی ہے۔

مراسلے میں کہا گیا ہے کہ کوئٹہ، ژوب، زیارت، بارکھان، لورالائی کوہلو میں شدید بارشیں ہوں گی، جبکہ کوئٹہ، پہاڑی اور شہری علاقوں میں سیلابی صورتحال پیدا ہوسکتی ہے۔

ضلعی حکام کو ہدایت کی گئی ہے کہ کوئٹہ میں کسی بھی ہنگامی صورتحال سے نمٹنے کے لیے عملہ تیار رہے اور ضروری مشینری کی دستیابی کو یقینی بنائی جائے۔