وزیراعلیٰ پنجاب کا سہولت بازار منصوبہ: سستی اشیاء اورہزاروں خاندانوں کو روزگار کی فراہمی

لاہور:وزیراعلیٰ پنجاب مریم نواز شریف کے وژن کے تحت شروع کیے گئے سہولت بازار منصوبے نے صوبے بھر میں عوام کو سستی اور معیاری اشیائے خورونوش کی فراہمی کے ساتھ ساتھ ہزاروں افراد کے لیے روزگار کے نئے مواقع پیدا کر دیے ہیں۔ 

تفصیلات کے مطابق وزیراعلیٰ مریم نواز شریف کے سہولت بازار پراجیکٹ سے55 ہزار خاندانوں کے گھرمیں چولہا جلنے لگا، پنجاب بھر میں 46 سہولت بازاروں میں 9200 لوگوں کو باعزت روزگار مل گیا۔ 

سہولت بازارو ں میں ایک سال کے دوران ساڑھے 8کروڑ افراد کی آمد ہوئی،ساڑھے 42 کروڑ روپے کی خریداری کی گئی، سہولت بازاروں میں سبزیوں اور پھلوں سمیت 13اشیائے خورونوش ہول سیل نرخ پر فراہم کی گئیں، جس سے صارفین کو 11کروڑ روپے کی بچت ہوئی۔

 وزیرآباد،چونیاں، جڑانوالہ، چنیوٹ،خانیوال، بھلوال، پتوکی، اوکاڑہ اورمظفر گڑھ کے سہولت بازاروں میں سستی اور معیاری اشیاء فراہم کی گئیں۔ 

وزیراعلیٰ مریم نواز نے سہولت بازار منصوبے کے دائرہ کار کو مزید وسیع کرنے کی ہدایت دیتے ہوئے 30 جون تک مزید 30 نئے سہولت بازار مکمل کرنے کا ہدف مقرر کیا ہے۔ انہوں نے متعلقہ حکام کو یہ بھی ہدایت کی ہے کہ سہولت بازاروں کو مرحلہ وار پنجاب کی ہر تحصیل میں قائم کیا جائے۔

اس موقع پر وزیراعلیٰ مریم نواز کا کہنا تھا کہ سہولت بازاروں کے ذریعے عوام کو سستی اور معیاری اشیاء کی آسان فراہمی ممکن بنائی گئی ہے اور پنجاب کے ہر شہری کو معیاری اشیاء مناسب قیمت پر مہیا کرنا حکومت کا عزم ہے۔