پی ٹی آئی رہنماحلیم عادل شیخ کو ماڈل ٹاؤن کچہری میں  پیش کردیا گیا

تفصیلات کے مطابق رہنما پی ٹی آئی حلیم عادل شیخ کو ماڈل ٹاؤن کچہری لاہور میں  پیش کر دیا گیا ۔ مقدمے کی تفصیلات بھی سامنے آگئیں،  اپوزیشن لیڈر سندھ اسمبلی کو جامشورو میں درج اینٹی کرپشن کی ایف آئی آر میں گرفتار کیا گیا ۔ سندھ حکومت نے پنجاب حکومت کو خط لکھ کر  گرفتاری میں پنجاب پولیس کی مدد مانگی تھی ۔ 

حلیم عادل شیخ پر 1987 میں جامشورو میں 63 ایکڑ اراضی کی جعلی رجسٹرڈ کرانے کا الزام ہے ،ان  کےخلاف تھانہ اینٹی کرپشن جامشورو میں مقدمہ درج ہے۔ 

حلیم عادل شیخ نے عدالت پہنچنے پر بیان میں کہا  کہ میں عمران خان کا سپاہی ہوں ،  حکومت جیسے بھی اوچھے ہتھکنڈے استعمال کرلے پیچھے ہٹنے والے نہیں،  کیس سیاسی انتقام کی بنیاد پر بنایا گیا ہے۔

ان کاکہنا تھا کہ جب اپوزیشن لیڈر نہیں تھا تو کوئی مقدمہ درج نہ ہوا ، اپوزیشن لیڈر بننے کے بعد 22 مقدمات درج کیے  گئے ، کرپشن میں ڈوبی حکومت نے میرے خلاف کرپشن کا کیس درج کیا ، میری جان کو خطرہ ہے ایک ہفتہ  پہلے چیف جسٹس پاکستان کو خط لکھا تھا ۔ 

اس موقع پر وکیل حلیم عادل شیخ کا کہنا ہے کہ اپوزیشن لیڈر سندھ اسمبلی کو گزشتہ روز سے حرا ست میں لیا گیا ہے ۔ جب گرفتار کیا گیا کوئی ایف آئی آر نہیں تھی  ، آج صبح سا ڑھے 10 بجے ایف آئی آر درج ہو ئی۔   وکیل حلیم عادل شیخ نے عدالت سے کہا ہے کہ درخواست ہے انہیں بذریعہ جہاز کراچی لے جایا جائے ۔ اگر روڈ سے لے کر جاتے ہیں تو ان کی جان کو خطرہ ہے۔

واضح رہے کہ حلیم عادل شیخ  کو گزشتہ رات لاہور کے نجی ہوٹل سے  سادہ کپڑوں میں ملبوس  افراد نے گرفتار کیا  تھا۔