لاہور ہائی کورٹ نے حلیم عادل شیخ کی گرفتاری غیرقانونی قرار دے دی

تفصیلات کے مطابق لاہور ہائی کورٹ  نے رہنما پاکستان تحریک انصاف اور سندھ اسمبلی میں اپوزیشن لیڈر حلیم عادل شیخ کی گرفتاری  کوغیرقانونی قرار دیتے ہوئے 18 جولائی تک حفاظتی ضمانت بھی منظور کر لی۔

لاہور ہائی کورٹ نے فیصلہ میں کہا کہ حلیم شیخ کی گرفتاری سے متعلق عدالت میں کوئی لیٹر پیش نہیں کیا گیا،حلیم عادل شیخ کو فوری رہا کیا جائے،جسٹس علی باقر نجفی نے حلیم عادل شیخ کی رہائی کا حکم جاری کیا۔

جسٹس علی باقر نجفی نے استفسار کیا کہ کوئی ایسا کاغذ ہے جس سے پتہ چلے کہ یہ تفتیشی ٹیم ہے جو گرفتار کرنے آئی ہے، مجھے کوئی ڈاکومنٹ نظر نہیں آ رہا۔

فیصلہ میں کہا گیا کہ اس میں کوئی شک نہیں رہنما تحریک انصاف کیخلاف مقدمہ درج کیا گیا مگر گرفتاری غیر قانونی ہے، عدالت کو مکمل اختیار ہے کہ اگر کسی کی گرفتاری غیر قانونی طور پر کی گئی ہے تو اسے آزاد کرے۔

واضح رہے کہ سندھ اسمبلی میں قائد حزب اختلاف حلیم عادل شیخ کو لاہور کے ہوٹل سے گزشتہ رات گرفتار کیا گیا تھا، ان پر سرکاری زمین کے جھوٹے کاغذات بنانے کا الزام تھا۔